ދޫނިދޫ ޖަލުގައި ހުއްޓާ އަމިއްލައަށް މަރުވި އަހުމަދު އަތުހަރުގެ މައްސަލައިގައި ހިމެނޭ ދެ ފުލުހެއްގެ މައްޗަށް ދައުވާ ކޮށްދިނުމަށް އެދި ހިއުމަން ރައިޓްސް ކޮމިޝަން (އެޗްއާރުސީއެމް) އިން ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވައިފި އެވެ.
އަތުހަރު ފުލުހުންގެ ބެލުމުގެ ދަށަށް ގެންދިޔަ ހިސާބުން އޭނާ މަރުވަންދެން ފުލުހުން އަމަލުކުރި ގޮތް ތަހުގީގު ކުރުމަށްފަހު އެޗްއާރްސީއެމް އިން މި މައްސަލައިގައި ދައުވާ ކޮށްދިނުމަށް އެދި ޕީޖީއަށް ފޮނުވާފައިވާއިރު އެކަމާ ގުޅޭ އިތުރު ތަފްސީލެއް އެޗްއާރްސީއެމްއިން ހާމަ ކޮށްފައި ނުވެއެވެ.
މިދިޔަ އޮގަސްޓް މަހުގެ 29 ވަނަ ދުވަހުގެ ރޭ ފުލުހުން އަތުހަރު ހައްޔަރު ކުރީ މާލޭގައި އަންހެނަކު ރަހީނު ކޮށްގެން ފިލަން މަސައްކަތް ކުރަނިކޮށެވެ. އަދި އޭނާ ހައްޔަރު ކުރުމުގެ ތެރޭގައި ބޮޑެތި އަނިޔާތަކެއް ލިބި އެ އަނިޔާތަކަށް ހޮސްޕިޓަލުގައި ފަރުވާދީފައިވާއިރު އެ މައްސަލައިގެ ޝަރީއަތް ނިމެންދެން ފުލުހުންގެ ބެލުމުގެ ދަށުގައި ދޫނިދޫގައި ހުއްޓާ އަތުހަރު މަރުވާން މަސައްކަތް ކުރީ ސެޕްޓެމްބަރު މަހުގެ 2 ވަނަ ދުވަހުއެވެ. އޭނާ ދަން ޖެހުނީ ލައިގެން ހުރި ސޯޓުގެ ނާޑުވާއެއް ބޭނުންކޮށްގެންނެވެ.
