2025 ވަނަ އަހަރަކީ “ބޯހިޔާވަހިކަމުގެ އަހަރަށް” ހައްދަވާނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ވިދާޅުވެއްޖެއެވެ.
އެ މަނިކުފާނު މިފަދައިން ވިދާޅުވެފައި ވަނީ މާލެ އަތޮޅު ގުޅިއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.
“މި ފެށުނު 2025 ވަނަ އަހަރު ވެގެންދާނީ މާތް ﷲ ގެ އިރާދަފުޅާއެކު، ގެދޮރުގެ ދަތިކަމުގެ މައްސަލަ ޙައްލު ކުރުމުގައި ޢަމަލީ ގޮތުން އެއް އަހަރެއްގެ ތެރޭގައި އެންމެ ގިނަ މަސައްކަތް ހިންގާނެ އަހަރަށް” މި ބައްދަލުވުމުގައި ރައީސް ވިދާޅުވިއެވެ.
2025 ވަނަ އަހަރަކީ “ބޯހިޔާވަހިކަމުގެ އަހަރަށް” ހައްދަވާނެ ކަމަށް ވިދާޅުވެ ވާހަކަފުޅުދައްކަވަމުން ރައީސް ވަނީ، މާލެ ފިޔަވައި ރާއްޖޭގެ އެހެން ހުރިހައި ސަރަޙައްދެއްގައި ކުރިއަށް ގެންދަވާނެ ކަމަށް ވަޢުދުވެވަޑައިގެންފައިވާ ބޯހިޔާވަހިކަމުގެ ހުރިހައި މަޝްރޫޢުތައް ޢަމަލީ ގޮތުން ހިންގައިދޭނެ ފަރާތްތައް ހޯދުމަށް، މި ހިނގާ ޖަނަވަރީ މަހުގެ ތެރޭގައި އިޢުލާން ކުރައްވާނެ ކަމުގައި ވިދާޅުވެފައެވެ. އެގޮތުން އެކި ފަރާތްތަކާ މަސައްކަތްތައް ޙަވާލު ކުރެވޭ ތަރުތީބުން، މި އަހަރު ވެގެންދާނީ ގެދޮރުވެރިކަމުގެ ދާއިރާއިން އެއް އަހަރެއްގެ ތެރޭގައި ޢަމަލީ ގޮތުން އެންމެ ގިނަ މަޝްރޫޢު ހިންގޭނެ އަހަރަށް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ބިން ހިއްކައި، ޖާގަ އިތުރު ކުރެވިފައި ވާ ރަށްތަކުގައިވެސް ކުރިއަށް ހުރި އަހަރުތަކުގެ ތެރޭގައި މިކަން ހިނގަމުންދާނެ ކަމަށް އެ މަނިކުފާނު ވިދާޅުވިއެވެ. ވެރިރަށް މާލެ ސަރަޙައްދުގެ މަޝްރޫޢުތައްވެސް އިޢުލާންކުރައްވާފައި ވާ ގޮތަށް ކުރިއަށްދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
މާލެ އަތޮޅު ގުޅިއާ ދާދި ކައިރީގައި އޮތް ފަޅަކީ، އަދުގެ ސަރުކާރުން ހިންގާ ބޯހިޔާވަހިކަމުގެ އެންމެ މުހިންމު މަޝްރޫޢު ހިނގާ ސަރަޙައްދުކަން ފާހަގަކުރައްވައި ވާހަކަފުޅުކުރިއަށް ގެންދަވަމުން ރައީސުލްޖުމްހޫރިއްޔާ ވަނީ، މާތް ﷲގެ އިރާދަފުޅާއެކު “ރަސްމާލެ” މަޝްރޫޢަކީ ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް އެއް ސަރަޙައްދަކުން އެންމެ ބޮޑު ޙައްލެއް ލިބޭނެ މަޝްރޫޢުކަމުގައި ވިދާޅުވެފައެވެ. އެގޮތުން އެމަޝްރޫޢުގެ ބިން ހިއްކުމުގެ ޢަމަލީ މަސައްކަތްތައް މިހާރުވެސް ކުރިއަށްދާއިރު، އިތުރު ފަރާތްތަކާ ގުޅިގެން މަޝްރޫޢު ފުޅާކޮށް، މަސައްކަތުގެ ދުވެލި، ދެތިންގުނައަށް ހަލުވިކުރެވިގެންދާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. މަޝްރޫޢު ނިމިގެންދާއިރު މުޅި ރާއްޖެއަށް، އަދި ރަސްމާލެ ހިމެނޭ ސަރަޙައްދަށްވެސް ފައިދާތަކެއް ގެނެސްދޭނެކަމުގެ ޔަޤީންކަން އެބައޮތް ކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.
އަތޮޅުތަކާއި، ރަށްތަކާއި، ސިޓީތަކުގެ ކައުންސިލުތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާ ބައްދަލުކުރެއްވުމަށް ރައީސުލްޖުމްހޫރިއްޔާ ފަށްޓަވައިގެން ކުރިޔަށްގެންދަވާ ސިލްސިލާ ދަތުރުފުޅުތަކުގެ ތެރެއިން، މިއަހަރު ކުރައްވާ އެންމެ ފުރަތަމަ ދަތުރުފުޅެއްގެ ގޮތުގައި ކ. ގުޅިއަށް ވަޑައިގެން ރައްޔިތުންނާ މުޚާޠަބުކުރައްވައި ވާހަކަފުޅުކުރިއަށްގެންދަވަމުން ރައީސުލްޖުމްހޫރިއްޔާ އިތުރަށް ވިދާޅުވީ، މި އަހަރަކީ ތަރައްޤީގެ ޢަމަލީ މަސައްކަތާއި މާލީ ތަނަވަސްކަން އިޙްސާސްކޮށްދިނުމުގެ ޢަމަލީ މަސައްކަތްތައް ވަރަށް ފުޅާ ދާއިރާއެއްގައި، އެހާމެ ބާރަށް ހިނގާނެ އަހަރެއް ކަމަށެވެ. ކުރިއަށްދާންވީ މި ރޫޙާއި އުންމީދުގައި ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ވާރުތަވި އިޤްތިޞާދަކާއެކު ނިމިދިޔަ އަހަރަކީ އެންމެ އެދިވަޑައިގެންނެވި ގޮތަށް ކަންކަން ހިނގި އަހަރަކަށް ނުވި ނަމަވެސް، މިދިޔަ އަހަރު ދުވަހުގެ ތެރޭގައި ހަރުދަނާ ކުރެއްވި، އިޤްތިޞާދީ ބިންގަލުގެ މަތީގައި ޤައުމު ބިނާކުރައްވަމުން ގެންދަވާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދިވެހި ރައްޔިތުންނަށް ދެއްވާފައެވެ.
ސަރުކާރުގެ އެކި ވުޒާރާތަކާއި، ސަރުކާރު ހިއްސާވާ ކުންފުނިތަކާ، އެ ނޫންވެސް ގޮތްގޮތުން އެކި ފަރާތްތަކުން ހޯދާފައިވާ ޚިދުމަތްތަކަށް ދޭންޖެހޭ އުޖޫރަ ޚަލާސް ކުރުމުގެ މަސައްކަތްތައް މިދިޔަ އަހަރު ކުރެއްވި ފަދައިން، މި އަހަރުގެ ފުރަތަމަ 2 މަސްދުވަހުގެ ތެރޭގައިވެސް އެމަސައްކަތް ކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
އެ މަނިކުފާނަށް އެންމެ މުހިންމު ކަމަކީ ރައްޔިތުންގެ ދުޅަހެޔޮކަމާއި، ރައްޔިތުންނަށް ކުރިމަތިވެފައިވާ އެކިއެކި މައްސަލަތަކަށް ދާއިމީ ޙައްލުތައް ހޯއްދަވައިދެއްވުން ކަމަށް ވާއިރު، ތަރައްޤީގެ ކަންކަން ބައްޓަންކުރައްވަނީވެސް މި މޭރުމުންކަން ރައީސުލްޖުމްހޫރިއްޔާ ފާހަގަކުރެއްވިއެވެ.
އަދާ ހަމައަށް ލިބިފައި ވަނީ މުޅިންވެސް ޢުމްރާނީ ނުވަތަ ފެންނަން ހުންނަ ތަރައްޤީއެއް ކަމަށާ، ނަމަވެސް އެ މަނިކުފާނުގެ ޢަމާޒަކީ، ޢުމްރާނީ ތަރައްޤީއާއެކު ފިކުރީ އަދި ރޫޙާނީ ތަރައްޤީ ހިމެނޭހެން ވަށާޖެހެނިވި ތަރައްޤީއެއް ގެނެސްދެއްވުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ވަގުތީ ހިތްހަމަނުޖެހުންތަކެއް ހުރި ކަމުގައި ވީ ނަމަވެސް، އެންމެން އެކަތިގަނޑެއްގެ ގޮތުގައި މަސައްކަތްކޮށް، ޤައުމަށާއި މުޖުތަމަޢަށް ފައިދާ ލިއްބައިދެނިވި މޭރުމަކުން ކަންކަން ކުރިއަށް ގެންދެވުމަށް ރައީސުލްޖުމްހޫރިއްޔާ ވަނީ ގޮވާލައްވާފައެވެ.
