ކީރިތި ގުރުއާން ހިތުދަސްކުރާ ހާފިޒުންގެ ދަސްވެނިވުމުގެ ހަފްލާ ކޮންމެ އަހަރެއްގައި ވެސް ބާއްވާނެ ތާރީހު ކަނޑައަޅައިފިއެވެ.
އިސްލާމިކް މިނިސްޓްރީން ބުނީ މި ހަފްލާ އޮންނާނީ ކޮންމެ އަހަރެއްގެ ރަމަޟާން މަހުގެ 27 ވިލޭރޭ ކަމަށެވެ. މި ހަފްލާގައި ދަސްވެނިވާ ފަރާތްތަކަށް ހާއްސަ ގައުނެއް ތައްޔާރުކުރުމަށް ނިންމާފައިވާއިރު މި ގައުނަކީ ކީރިތި ގުރުއާން ހިތުދަސްކޮށް ނިންމި ފަރާތްތަކުގެ ހާއްސަ ފާހަގައެއްގެ ގޮތުގައި ބޭނުންކުރެވޭނެ އެއްޗެކެވެ. މި ގައުނުގެ ޑިޒައިނާއި ކުލަ އަދި އެހެނިހެން ތަފްސީލުތައް ފަހުން ހާމަކުރާނެކަމަށް މިނިސްޓްރީން ވަނީ ބުނެފައެވެ.
އިސްލާމީ ކަންތައްތަކާ ބެހޭ ވަޒީރު މުހައްމަދު ޝަހީމް އަލީ ސައީދު ކުރެއްވި ޕޯސްޓެއްގައި ވިދާޅުވީ މި ހަފްލާގެ ފުރަތަމަ ބުރު ބޭއްވުމަށް ހަމަޖެހިފައިވަނީ މި އަންނަ ރަމަޟާން މަހުގެ 27 ވިލޭރޭ ކަމަށެވެ.
