ގާނޫނުއަލްއުގޫބާތުގައިވާ ގޮތުން އަމިއްލައަށް މަރުވާން އުޅުމަކީ ޖުނަހުގެ އެއް ވަނަ ދަރަޖައިގެ ކުށެކެވެ. އަދި އެއީ އަސާސީ މިންގަނޑުން ބަލާއިރު، ހަތަރު މަހާއި 24 ދުވަހުގެ ޖަލު ހުކުމެއް އަންނާނެ ކުށެކެވެ. އަދި އޭގެ އެންމެ ބޮޑު އަދަބަކީ އެއް އަހަރަށް ޖަލަށްލުމެވެ.

އަމިއްލައަށް މަރުވުމަކީ އޭގެ ފާފަވެރިކަން ބޮޑު ނުބައި ޢަމަލެކެވެ. މާތް ﷲ ވަޙީކުރައްވާފައިވެއެވެ. “އަދި، ތިޔަބައިމީހުންގެ އަމިއްލަ ނަފްސުތައް ތިޔަބައިމީހުން ޤަތުލު ނުކުރާށެވެ! ހަމަކަށަވަރުން، ތިޔަބައިމީހުންގެ މައްޗަށް ރަޙީމުވަންތަ ރަސްކަލާނގެ ކަމުގައި اللَّه ވޮޑިގެންވެއެވެ. ދެކޮޅުވެރިކަމާއި، އަނިޔާވެރިކަމުގެ ގޮތުން އެކަންތައް ކުރާމީހާ (ދަންނާށެވެ!) ފަހެ، ތިމަންރަސްކަލާނގެ އެމީހަކު ނަރަކަޔަށް ވައްދަވާހުށީމެވެ. އަދި، އެކަންތައް އެއީ، اللَّهއަށް ދާދި ފަސޭހަކަމެއް ކަމުގައިވެއެވެ.”