އެއްގަމާއި ކަނޑުގައި ދުއްވާ އުޅަނދުފަހަރުން ކޮންމެ އަހަރަކު އެއް ފަހަރު ދައްކަން ޖެހޭ ފީއާއި އަހަރީ ފީ ނުދެއްކުމުގެ ސަބަބުން އަރައިފައިވާ ޖޫރިމަނާގެ ފައިސާއާއި އެ ނޫން ވެސް ޖޫރިމަނާގެ ފައިސާ، އިންސްޓޯލްމެންޓް އުސޫލުން ބަހައިލައިގެން ދެއްކުމުގެ ފުރުސަތު ދީފިއެވެ.
މި އިންތިޒާމް ސަރުކާރުން ހަމަަޖައްސަވާފައި ވަނީ ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން ގެޒެޓްކުރައްވާފައިވާ އެއްގަމު އުޅަނދާއި ކަނޑު އުޅަނދުފަހަރާ ގުޅޭގޮތުން ދައްކަންޖެހޭ އަހަރީފީއާއި ޖޫރިމަނާގެ ފައިސާ ބަހައިލައިގެން ދެއްކުމުގެ ގަވާއިދުގެ ދަށުންނެވެ.
އެ ގަވައިދުގައި ވަނީ ބަހައިލައިގެން ފައިސާ ދައްކަން ބޭނުންވާ މީހުން އެކަމަށް އެދި ޓްރާންސްޕޯޓް މިނިސްޓްރީއަށް ލިޔުން ހުށަހަޅަން ވާނެ ކަމަށެވެ. އެ ފުރުސަތު ދިނުމުގައި ބަލާ ޝަރުތުތަކަކީ:
ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން އެކުލަވާލާފައިވާ މި ޤަވާއިދުގެ މަޤްޞަދަކީ އެއްގަމުގައި ދުއްވާ އުޅަނދުތަކުންނާއި ކަނޑު ދަތުރުފަތުރުކުރާ އުޅަނދުފަހަރުން ކޮންމެ އަހަރަކު އެއްފަހަރު ދައްކަންޖެހޭ އަހަރީފީއާއި އަހަރީފީ ނުދެއްކުމުގެ ސަބަބުން އަރައިފައިވާ ޖޫރިމަނާގެ ފައިސާއާއ،ި އަދި އެނޫންވެސް ޖޫރިމަނާގެ ތެރެއިން ދައުލަތަށް ދައްކަން ޖެހި ނުދެއްކި ހުރި ފައިސާ އެކީ އެއްފަހަރާ ދައްކަން ދަތިވާ ފަރާތްތަކަށް ލުއިފަސޭހަ ގޮތެއްގައި ދެއްކޭނެ މަގު ފަހިކޮށްދިނުމެވެ.
އެ ޝަރުތުތައް ހަމަވާ މީހުންގެ ތެރެއިން، ބަހައިލައިގެން ފައިސާ ދެއްކުމަށް މިނިސްޓްރީއާއެކު އެއްބަސްވުމެއް ހަދާނީ، އެ މީހަކު ދައްކަން ޖެހޭ ފައިސާގެ އަަދަދުގެ ކޮންމެވެސް މިންވަރެއް ‘ކޮމިޓްމެންޓް ފީ’ގެ ގޮތުގައި ދެއްކުމުންނެވެ. އެ އަަދަދުތައް ގަވައިދުގައި ތަފުސީލުކޮށްދީފައިވާއިރު، އޭގެ ތެރޭގައި، 5،000އާއި 10،000 ރުފިޔާއާ ދެމެދުގެ އަދަދެއް ދައްކަން ޖެހޭ މީހަކު ކޮމިޓްމެންޓް ފީގެ ގޮތުގައި އެ ފައިސާގެ 18 ޕަސެންޓް ދައްކަން ޖެހެއެވެ. އެ ފައިސާ ދެއްކުމުން ހަދާ އެއްބަސްވުމުގެ ދަށުން 10 މަހަށް ބަހައިލައިގެން އެ މީހަކަށް ފައިސާ ޚަލާސްކުރެވޭނެއެވެ.
އެ އިންސްޓޯލްމެންޓް އެއްބަސްވުމާ އެއްގޮތަށް ފައިސާ ނުދައްކައި، މަގުބޫލު އުޒުރެއް ނެތި 30 ދުވަސް ވެއްޖެ ނަމަ އެއްބަސްވުން ބާތިލުކުރުމުގެ އިޚުތިޔާރު މިނިސްޓްރީއަށް ލިބިދީފައިވެއެވެ.
