ދިވެހި ބަހާއި ދިވެހިވަންތަކަމަށް އިސްކަންދިނުމަކީ އައު އަހަރުގެ އަޒުމަކަމަށް ހެދުމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހިމް އެދިވަޑައިގެންފިއެވެ.
މި އަހަރު ދިވެހިބަހުގެ އެކެޑަމީން ބޭއްވި އަދަބީ ބައެއް މުބާރާތްތަކުގެ ނަތީޖާ ފާޅުކުރުމުގެ ބޭއްވި ޖަލްސާގައި ވާހަކަ ދައްކަވަމުން ވަޒީރު ވިދާޅުވީ އަންނަ އަހަރު ކޮންމެ ކުއްޖަކުވެސް ބަހާއި އަދަބިއްޔާތާއި ދިވެހި ވަންތަކަމުގެ ދައިރާއިން ކޮންމެސްކަމެއް އަމިއްލަ ނަފްސުގެ މައްޗަށް އިސްކުރުން މުހިންމުކަމަށެވެ. އެގޮތުން ސުކޫލު މާހައުލުގައްޔާއި ރަހުމަތްތެރިންގެ ތެރޭގައި މުއާމަލާތްކުރުން ފަދަ ކަންކަމުގައި މި ދާއިރާތަކުން ބޭނުން ހިފުން މުހިންމުކަމަށް ވަޒީރު ވިދާޅުވިއެވެ.
ތާޖުއްދީން ސްކޫލްގައި ކުރިއަށް ގެންދިޔަ ނާތީޖާ ފާޅުކުރުމުގެ ރަސްމިއްޔާތުގައި ދިވެހިބަހުގެ އެކެޑަމީން ބޭއްވި އަދަބީ ތިން މުބާރާތްކަމުގައި ވާ އަލްއުސްތާޛު މުޙައްމަދު ޖަމީލު ދީދީގެ ހަނދާނީ ވާދައިގެ ތައްޓަށް ބާއްވާ މަޒުމޫނު ލިޔުމުގެ 39ވަނަ ގައުމީ މުބާރާތާއި، އައްޝައިޚް މަލިމް މޫސާ މާފަތްކަލޭފާނުގެ ހަނދާނީ ވާދައިގެން ތައްޓަށް ބާއްވާ ކުރުވާހަކަ ލިޔުމުގެ 36ވަނަ ގައުމީ މުބާރާތުގެ އިތުރުން ހުތްޢަލިދީދީގެ ވާދައިގެ ތައްޓަށް ބާއްވާ ޅެންހެދުމުގެ 27ވަނަ ގައުމީ މުބާރާތުގެ ނަތީޖާ ވަނީ ފާޅުކޮށްފައެވެ.
މި ތިން މުބާރާތަކީ މުޅި ރާއްޖެއަށް ހުޅުވާލާއިގެން ބާއްވާފައިވާ މުބާރާތްތަކެކެވެ. މި މުބާރާތްތަކުން ސްކޫލުތަކުގެ ބައިގެ ކޮންމެ އުމުރުފުރާއަކުންނާއި އަމިއްލަ ފަރާތްތަކުގެ 18އަހަރުން ދަށާއި 18އަހަރުން މަތީގެ ގިންތީން އެއްވަނަ، ދެވަނަ، ތިންވަނަ ދަރިވަރުންނާއި، މީހުން ވަނީ ހޮވާފައެވެ.
