ބުރާސްފަތިދުވަހު ހިނގި އަލިފާނުގެ ހާދިސާގައި ގިނަ މިނިސްޓްރީތަކެއް ހިންގަމުންދިޔަ އިމާރާތުގައި ރޯވެ ތަނުގެ ބޭނުން ނުކުރެވޭވަަރަށް ހަލާކުވުމާއި ގުޅިގެން އެތަނުގައި ހިންގަމުންދިޔަ މިނިސްޓްރީތަައް ދަރުބާރުގެއަށް ބަދަލު ކުރުމުގެ މަސައްކަތް ކުރަމުންދާކަމަށާއި ހައުސިންގ މިނިސްޓްރީގެ މަސައްކަތް އަންނަ އާދީއްތަ ދުވަހު އަލުން ފެށޭނެ ކަަަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
އަލިފާނުގެ ހާދިސާގައި ހައުސިން މިނިސްޓްރީއާއި، އިންފްރާންސްޓަކްޗަރު މިނިސްޓްރީގެ އިތުރުން އެންވަޔަރަމެންޓް މިނިސްޓްރީ ހިންގާ އިމާރާތަށް ބޮޑެތި ގެއްލުންތަކެއް ލިބި، އެ މިނިސްޓްރީތަކުގެ ޚިދުމަތް ވަގުތީ ގޮތުން ވަނީ މެދުކެނޑިފައެވެ.
މި އަލިފާނުގެ ހާދިސާގައި އެ އިމާރާތުގައި ހިންގި މާލެ ސިޓީ ކައުންސިލްގެ ބަޔަކަށް ވެސް ގެއްލުންތަކެއް ލިބިފައިވެއެވެ. އެ ގެއްލުމާ ގުޅިގެން މާލެ ރައްޔިތުންނަށް ދެމުން އައި އެއްވެސް ޚިދުމަތަކަށް ބުރޫ ނާރާނެހެން މާލެ ސިޓީ ކައުންސިލުން ދެމުންއައި ޚިދުމަތްތައް ވަގުތީ ގޮތުން ވަނީ ހުޅުމާލެއަށް ބަދަލުކޮށްފައެވެ.
ނަމަވެސް އަލިފާނުގެ އަސަރު ކުރި އިމާރާތުގައި ހުރީ ކައުންސިލުން ބަލަހައްޓާ މާލޭ ރައްޔިތުންގެ އުފަން ރިކޯޑާއި ރަށްވެހިކަމުގެ އެކި ބާވަތުގެ ސެޓްފިކެޓާއި ގޯތި ގެދޮރުގެ ރަޖިސްޓްރީއާއި ރަށްވެހިންގެ ރަޖިސްޓްރީއާއި އިމާރާތުގެ ހުއްދަތައް ފަދަ ލިޔެކިޔުންތައް ކަމަށް އެ ކައުންސިލުން ބުންޏެވެ. އެ ލިޔެކިޔުންތަކުގެ ތެރެއިން ބައެއް ތަކެއްޗަކީ އިޔާދަ ކުރެވޭނެ ތަކެތި ނަމަވެސް، ބައެއް ލިޔެކިޔުންތައް އިޔާދަ ނުކުރެވޭނެކަމަށް އެ ކައުންސިލުން ވަނީ ބުނެފައެވެ.
އަމީނީ މަގު، ދިވެހިރާއްޖޭގެ އަޑު ކުރިމަތީގައި ހުންނަ ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީގައި ހިނގި އަލިފާނުގެ ހާދިސާގައި އެ ދެ ތަން ބޭނުން ނުކުރެވޭ ވަރަށް ވަނީ އަނދައިފައެވެ. އަދި އެ އިމާރާތާ ކައިރީގައި ހުންނަ ގްރީން ބިލްޑިންގައި ވެސް އަލިފާން ރޯވެ ގެއްލުންތަކެއް ވިއެވެ. އެއީ އެންވަޔަރަމަންޓް މިނިސްޓްރީ އާއި އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) ހިންގަމުން އަންނަ އިމާރާތެވެ.
ދައުލަތުގެ މީޑިއާ ޕީއެސްއެމްއާ ވާހަކަދައްކަވަމުން މިނިސްޓަރ ހައިދަރް ވިދާޅުވީ، އެ ވުޒާރާގެ ސާވާ އެއްވެސް ވަރަކަށް ސަލާމަތް ނުކުރެވުނު ކަމަށާއި، ނަމަވެސް ފްލެޓް ލިސްޓާއި، މަޝްރޫއުތަކާއި ގުޅޭ މުހިންމު މައުލޫމާތު ރައްކާ ކުރެވިފައި އެބަ ހުރި ކަަމަށެވެ.
މި ހާދިސާގައި އެ އިމާރާތް ބޭނުން ނުކުރެވޭ ވަރަށް އަނދައިފައިވާއިރު، މި ހާދިސާގައި އެއްވެސް މީހަކަށް އަނިޔާވެފައެއް ނުވެއެވެ.
