500 ޑޮލަރު މާރުކުރަންޖެހޭ ގޮތަށް ބޭރު ފައިސާއާއި ބެހޭ ބިލުގައި އޮތުމަކީ ރަނގަޅު ބަދަލެއްކަމަށާއި، ނަތީޖާއަކަށް ވާނީ އާއްމު ރައްޔިތުންނަށާއި ކުދި އަދި މެދު ފަންތީގެ ވިޔަފާރިވެރިންނަށް ޑޮލަރުގެ ތިޔާގިކަން ލިބިގެންދިއުންކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ބޭރު ފައިސާ މާރުކުރުމާ ގުޅޭގޮތުން އެމްއެމްއޭއިން އެކުލަވާލި ބިލާގުޅޭގޮތުން ސޯޝަލް މީޑީއާގައި ކުރެއްވި ޕޯސްޓެއްގައި ރައީސް ވިދާޅުވީ ބޭރު ފައިސާއާ ބެހޭ ބިލު މިހާރު އެކުލަވާލާފައިވާ ގޮތުން ބޭންކިން ނިޒާމުގައި ދައުރުވާ ޑޮލަރު ކުރިން އަންދާޒާކުރި ވަރަށްވުރެ އިތުރުވާނެ ކަމަށެވެ.
‘އަލަށް އެކުލަވާލާ މި ޤާނޫނުގެ ސަބަބުން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރު ކުރެވިގެންދާނެ.އަދި ޓޫރިޒަމް ނޫން ދާއިރާ ތަކުންވެސް ވަކި ވަރަކަށްވުރެ ގިނައިން ޑޮލަރު ޢާމްދަނީ ލިބޭނަމަ، ޑޮލަރު މާރުކުރަންޖެހޭ ގޮތަށް ހިމަނާފައިވައިވުމުން ބޭންކިން ނިޒާމުގައި ދައުރުވާ ޑޮލަރު ކުރިން އަންދާޒާކުރި ވަރަށްވުރެ އިތުރުވެގެންދާނެ. މި ފަހި ބަދަލުތަކުގެ ނަތީޖާއަކަށް ވެގެންދާނީ އާއްމު ރައްޔިތުންނަށާއި ކުދި އަދި މެދު ފަންތީގެ ވިޔަފާރިވެރިންނަށް ޑޮލަރުގެ ތިޔާގިކަން ލިބިގެންދިއުން” ރައީސްވިދާޅުވިއެވެ.
އަލަށް އެކުލަވާލި ބޭރުފައިސާއާ ބެހޭ ގަވާއިދުގައި ޓޫރިސްޓުންނަށް ޚިދުމަތްދޭ ތަންތަނުން ޚިދުމަތް ހޯދާ މީހުންގެ ބޮލަށް ވަކިވަރަކަށް ޑޮލަރު ރާއްޖޭގެ ބޭންކްތަކުގައި މާރުކުރަން ޖެހެއެވެ. އޭގެ ތެރޭގައި ހިމެނެނީ ރިސޯޓްތަކުން ޚިދުމަތް ހޯދާ ޓޫރިސްޓުންގެ ބޮލަކަށް 500 ޑޮލަރު މާރުކުރަން ޖެހުމެވެ.
މި ގަވާއިދާމެދު ޓޫރިޒަމް އިންޑަސްޓްރީގެ އެންމެ އިސްވެރިން ހިމެނޭ ގޮތަށް ކަންބޮޑުވުން ފާޅުކުރިއެވެ. ނަމަވެސް މި ސަރުކާރަށް އެއް އަހަރު ފާހަގަ ކުރުމަށް މިމަހުގެ 17ވަނަ ދުވަހު ބޭއްވި ރަސްމިއްޔާތުގައި ރައީސް ވަނީ އެ ގަވާއިދު ބަދަލު ނުކުރައްވާނެ ކަމަށާއި ޖެހޭނީ 500 ޑޮލަރު މާރުކުރަން ކަމަށް ހަރުއަޑުން ވިދާޅުވެފައެވެ.
ރައީސް ވިދާޅުވީ 17 ނޮވެމްބަރ 2024 ގައި އެމަނިކުފާނު ވިދާޅުވިފަދައިން ގަވައިދު ތަންފީޒުކުރުން ވަރުގަދަ ކުރުމަށްޓަކައި އެމްއެމްއޭ އިން އިސްނަގައިގެން ބޭރު ފައިސާ އާއިބެހޭ ޤާނޫނެއް ހެދިގެން ދިއުމަކީ މުހިއްމުކަމެއްކަމަށެވެ. ސަރުކާރަށް އަހަރެއްވުމާއި ގުޅިގެން ބޭއްވި ޖަލްސާގައި ރައީސް ވިދާޅުވެފައިވަނީ ރާއްޖެ އަންނަ ފަތުރުވެރިންގެ ބޮލަކަށް 500 ޑޮލަރު މާރުކުރަންޖެހޭގޮތަށް އެކުލަވާލި ޤަވާއިދަށް ބަދަލު ނުގެންނަވާނެކަމަށާއި، އެ ގަވާއިދަށް ތަބާވުމަކީ އެންމެންގެ މައްޗަށް ލާޒިމު ކަމެއްކަމަށެވެ. އަދި ބޭރު ފައިސާގެ ދަތިކަން ޙައްލުކޮށް، އެމް.އެމް.އޭ.އަށް ފަސޭހަކޮށްދިނުމަށް، އެކަމަށް ޚާއްޞަ ފްލެކްސް ޤާނޫނެއްވެސް މަޖިލީހުން ފާސްކޮށްދެއްވާނެކަމަށް އެމަނިކުފާނު ވިދާޅުވެފައިވެއެވެ.
އެމްއެމްއޭއިން ވަނީ އެ ބިލު އެކުލަވައިލައިފައި ވަނީ، މިދިޔަ މަހުގެ އެކެއްގައި އަމަލުކުރަން ފެށި ބޭރު ފައިސާއާ ބެހޭ ގަވައިދުގައި ހިމެނޭ ބައެއް ކަންތައްތައް ހަރުދަނާ ކުރުމަށް ފަހު ކަމަށް ބުނެފައެވެ.
