އައިވީއެފް މެދުވެރިކޮށް ފަރުވާ ހޯދުމުގެ ފުރުސަތު އިތުރު 64 މީހަކަށްދީ، އެ މިހުންގެ ލިސްޓް ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން އާންމުކޮށްފިއެވެ.
އެންސްޕާއިން ބުނީ އޮކްޓޯބަރު 31 2024 ގައި އާންމު ކުރެވުނު “އައިވީއެފް” ގެ ފަރުވާގެ ހަރަދު ކުރުމަށް ދަތިވާ ފަރާތްތަކުން “ދައުލަތުގެ އެހީއަށް އެދި ހުށަހަޅާ ފޯމް” މެދުވެރިކޮށް އެހީއަށް އެދި ހުށަހަޅުއްވާފައިވާ ފަރާތްތަކުގެ ދެވަނަ ބުރުގެ ލިސްޓާއި ގުޅިގެން ހުށަހެޅުނު ޝަކުވާތަކަށް ރިއާޔަތްކޮށް ދެވަނަ ބުރުގެ ލިސްޓް މުރާޖާ ކޮށްފައިވާކަމަށެވެ.
މިގޮތުން ދެވަނަ ބުރުގައި ފޯމު ހުށަހެޅި ޖުމްލަ 216 ފަރާތްތަކުގެ ތެރެއިން، އެހީއަށް ޝަރުތު ހަމަވެފައިވާ 64 ފަރާތަށް، ދެވަނަ ބުރުގައި އެހީ ހަމަޖެހިފައިވާ ކަމުގައި އެންސްޕާއިން ވަނީ ބުނެފައެވެ. އަދި ދެވަނަ ބުރުގައި އެހީ ހަމަޖެހިފައިވާ ފަރާތްތަކުން ނޮވެމްބަރު 30، 2024ގެ ކުރިން ފަރުވާ ކުރިޔަށްގެންދާނެގޮތުގެ ޕްލޭން ހިއްސާކޮށް މައުލޫމާތު ސާފުކުރުމަށް އެންސްޕާއިން ވަނީ އެދިފައެވެ.
އާސަންދައިގެ ދަށުން އައިވީއެފްގެ ފަރުވާ 100 ދެމަފިރިއަކަށް ދިނުމަށް ހަމަޖެހިފައިވާއިރު މިދިޔަ ޖުލައި މަހު ވެސް 37 މީހަކަށް އެ ފުރުސަތު ދީފައިވެއެވެ.
