އެމްއެންޑީއެފް ސްޕެޝަލް ފޯސަސްއާއި ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީޒް ގުޅިގެން ރާއްޖެއާއި ސްރީލަންކާގައި ހިންގި “ސެޓްފިކެޓް 4 އިން ސްޕެޝަލް އޮޕަރޭޝަންސް ކޯސް 5” ފުރިހަމަކުރި ސިފައިންނަށް، މެރޫން ބެރޭ ހަވާލުކޮށްފިއެވެ.
ނަސްރުގެ ދުވަހު ޖުމްހޫރީ މައިދާނުގައި ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވައި، ސްޕެޝަލް އޮޕަރޭޝަންސް ކޯސް ފުރިހަމަ ކުރި ސިފައިންނަށް މެރޫން ބެރޭ ހަވާލުކޮށްދެއްވީ ރައީސުލްޖުމްހޫރިއްޔާ، އަދި ސިފައިންގެ އެންމެމަތީ ވެރިޔާ، ޑރ.މުޙައްމަދު މުޢިއްޒެވެ. މީގެ އިތުރުން މި ކޯސް ފުރިހަމަ ކުރި ސިފައިންނަށް މަޤާމުގެ ކުރިއެރުމާއި ފްލޭޝް ހަވާލުކޮށްދެއްވީ އާއިލާގެ މެމްބަރުންނެވެ.
މި ރަސްމިއްޔާތުގައި ސެޓްފިކެޓް 4 އިން ސްޕެޝަލް އޮޕަރޭޝަންސް ކޯސް ފުރިހަމަ ކުރި ސިފައިންނަށް ޢަޒުމް ލައިދެއްވީ ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޣިޔާޡް އެވެ. މި ރަސްމިއްޔާތުގައި ނަޞްރުގެ ދުވަހު އެމްްއެންޑީއެފުން ބޭއްވި މިިލިޓްރީ ޑިސްޕްލޭގެ ތެރެއިން މިކޯހުގެ ދަރިވަރުންގެ ޚާއްޞަ ޑެމޮންސްޓްރޭޝަނެއް ވަނީ ދައްކާފައެވެ.
ސެޓްފިކެޓް 4 އިން ސްޕެޝަލް އޮޕަރޭޝަން ކޯސް 5 ހިންގާފައި ވަނީ 2022 އޮކްޓޫބަރު 22 އިން 2024 ޖޫން 1 ވަނަ ދުވަހުގެ ނިޔަލަށެވެ. ރާއްޖެއާއި އަވަށްޓެރި ސްރީލަންކާގައި ކުރިއަށްގެންދެވުނު މި ކޯސް ފެށީ 42 ދަރިވަރުންނާއެކު ގައެވެ. ނަމަވެސް މިކޯހުން ފަޚުރުވެރިކަމާއެކު ދަސްވެނިވެފައި ވަނީ 17 ދަރިވަރުންނެވެ.
ސްޕެޝަލް އޮޕަރޭޝަންސް ކޯހަކީ ސްޕެޝަލް ފޯސަސްއާއި ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީޒް ގުޅިގެން މޯލްޑިވްސް ކޮލިފިކޭޝަން އޮތޯރިޓީން ޤަބޫލުކުރާ ސެޓްފިކެޓް ލެވެލް 4 ގެ މިންގަނޑަށް ހިންގާ ކޯހެކެވެ.
ދިވެހިރާއްޖޭގެ ސަރަހައްދާއި ދިވެހީންގެ ލޭނާރުތައް ހިމާޔަތްކޮށް ދިވެހިރާއްޖޭގެ މިނިވަންކަމާއި ސިޔާދަތު ދިފާޢު ކުރުމަށް އިސްތިރާޖީ ގޮތުން ޚާއްޞަ ބާރުތަކެއް ދިވެހި އަސްކަރިއްޔާގައި އޮތުމުގެ މުހިންމުކަން ބޮޑުވުމާއެކު، އެމްއެންޑީއެފް އޭރިއާ އޮފް އޮޕަރޭޝަންސްގައޮި ކޮމްބެޓް ޓެރަރިޒަމް، އަދި ޑައިރެކްޓަރޭޓް އޮފް އޮޕަރޭޝަންސް ޚާއްޞަ ފައުޖެއް އެންމެ ފުރަތަމަ އުފެއްދީ 2006 ޖުލައި 26 ވަނަ ދުވަހުއެވެ. އެއީ ދިވެހި އަސްކަރިއްޔާގައި އެންމެ ވާރުގަދަ އެލީޓް ފޯސް ކަމުގައި ސްޕްޝަލް ފޯސަސްއެވެ. މިޚާޢްޞަ ފައުޖު އުފެއްދުމަށްފަހު ފުރަތަމަ ކޮމާންޑާރެއްގެ ގޮތުގައި އައްޔަންކޮށްފައި ވަނީ މިހާރުގެ ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަޙްމަދު ޣިޔާޡް އެވެ.
