އައްޑޫ ސިޓީގެ ފަތުރުވެރިކަން ކުރިއަރުވަން އަންނަ އަހަރު އެ ސިޓީގައި ސިމްޕޯޒިމްއެއް ބާއްވާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެއެވެ.
އައްޑޫގެ ފަތުރުވެރިކަމަށް ޚާއްސަ ބްރޭންޑާއި ވެބްސައިޓް ލޯންޗު ކުރުމަށް ރޭ ބޭއްވި ރަސްމިއްޔާތުގައި ފައިސަލް ވިދާޅުވީ، އަންނަ އަހަރުގެ ފުރަތަމަ ނުވަތަ ދެވަނަ ކުއާޓަރުގެ ތެރޭގައި ސިމްޕޯޒިމް ބާއްވަން މަސައްކަތް ކުރާނެ ކަމަށެވެ.
މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) ގެ ބެލުމުގެ ދަށުން ކުރިއަށްދާ މި މަސައްކަތުގެ ތެރެއިން ޗައިނާއާއި އިންޑިއާގެ ޓުއާ އޮޕަރޭޓަރުންނާއި ބައެއް އެއާލައިންތަކާއި ބުކިން.ކޮމް އާއި އަގޯޑާ ފަދަ އޭޖެންސީތައް ބައިވެރިކުރުމަށް މަސައްކަތް ކުރަމުން އަންނަ ކަމަށް ފައިސަލް ވިދާޅުވިއެވެ. މީގެ އިތުރުން ފައިސަލް ވިދާޅުވީ އައްޑޫގައި ޓޫރިޒަމަށް ހުރި ފުރުސަތުތަކާއި ވަޒީފާގެ ފުރުސަތުތައް ކިޔައިދިނުމަށް ބާއްވާ މި ސިމްޕޯޒިމްގައި ފުވައްމުލައް ސިޓީ އާއި ގއ. އަދި ގދ. އަތޮޅުގެ ފަތުރުވެރިކަމާ ގުޅުންހުރި ވިޔަފާރިތައް ބައިވެރިކުރާނެ ކަމަށެވެ. އަދި ހުރިހާ ފަރާތްތަކުން އެއްކޮށް މަސައްކަތް ކޮށްގެން ނޫނީ މި ސިނާއަތް ކުރިއެރުވެން ނެތް ކަމަށް ފައިސަލް ވިދާޅުވިއެވެ.
މީގެ އިތުރުން ފައިސަލް ވިދާޅުވީ މިވަގުތަށް އެންމެ މުހިންމީ ޓޫރިޒަމަށް ހުރި ފުރުސަތުތަކަށް ރައްޔިތުންނަށް ހޭލުންތެރިވެ، މިކަމުގައި ހުރި ފުރުސަތުތައް ޒުވާން ޖީލަށް ކިޔައިދިނުން ކަމަށެވެ.
