ބަންގްލަދޭޝްގައި ސިއްޙީ ދާއިރާގެ އިންޓާންޝިޕް ޕްރޮގްރާމްތަކުގައި ތިބި ދިވެހި ދަރިވަރުންނަށް ޚާއްސަ އިސްކަމެއް ދީގެން، ތަޖުރިބާގެ ފުރުސަތުތައް އިތުރު ކުރުމަށް ބަންގްލަދޭޝްގެ ވަގުތީ ސަރުކާރުގެ ޗީފް އެޑްވައިޒަރު ޑރ. މުޙައްމަދު ޔޫނުސް އާއި ރައީސް ޑރ. މުޙައްމަދު މުޢިއްޒު މަޝްވަރާ ކުރައްވައިފިއެވެ.
އެމެރިކާގެ ނިއުޔޯކުގައި ކުރިއަށްދާ އދ.ގެ އާންމު މަޖިލީހުގެ 79 ވަނަ ސެޝަންގެ ހަވާސާގެ ތެރެއިން ބަންގްލަދޭޝްގެ ވަގުތީ ސަރުކާރުގެ ޗީފް އެޑްވައިޒަރު ޑރ. މުޙައްމަދު ޔޫނުސްއާއެކު ބޭއްވެވި ބައްދަލުކުރެއްވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދެ ޤައުމުގެ ދެމެދުގައި ތަޢުލީމީ ދާއިރާއިން ގުޅުން އިތުރަށް ބަދަހިކުރަން ބޭނުންފުޅުވާކަމަށް ވިދާޅުވެފައެވެ. އަދި މެޑިކަލް ދަރިވަރުންނަށް އިންޓާންޝިޕް ޕްރޮގްރާމްތަކުން އިތުރު ފުރުޞަތުތައް ފަހިކޮށްދެއްވުމަށް ރައީސުލްޖުމްހޫރިއްޔާ އެދިވަޑައިގެންނެވިއެވެ.
މި ބައްދަލު ކުރެއްވުމުގައި ރައީސް މުޢިއްޒުވަނީ ދެ ގައުމުގެ ދެމެދުގައި ވަކީން ޚާއްސަކޮށް، އެކްސްޗޭންޖު ޕްރޮގްރާމްތައް މެދުވެރިކޮށް ތަޢުލީމީ ދާއިރާއިން ގުޅުން ބަދަހިކުރުމުގެ ބޭނުންތެރިކަން ފާހަގަ ކުރައްވައިފައެވެ
ރައީސުލްޖުމްހޫރިއްޔާއާއި ޗީފް އެޑްވައިޒަރ ޑރ. ޔޫނުސް ވަނީ ދެ ޤައުމުގެ ދެމެދުގައި އޮންނަ ބަދަހި ގުޅުން ފާހަގަކުރައްވައި، ދެޤައުމުގެ ދޭދޭ ފަރުދުންގެ މެދުގައި އޮންނަ ގުޅުމާއި، މޫސުމަށް އަންނަ ބަދަލުތަކަށް ހޭނުމާއި، ކަނޑުތަކާއި ގުޅިފައިވާ އިޤްތިޞާދީ ފުރުޞަތުތަކާއި، ދެމެހެއްޓެނިވި ގޮތެއްގައި އެ ފުރުޞަތުތަކުގެ ބޭނުން ހިފުމާބެހޭގޮތުން މަޝްވަރާކުރައްވާފައެވެ.
މި ބައްދަލު ކުރެއްވުމުގައި ދެ ލީޑަރުން ވެސް ވަނީ ދެ ގައުމުގެ ދެމެދުގައި އޮތް ޑިޕްލޮމެޓިކް ގުޅުން އިތުރަށް ހަރުދަނާކޮށް، މަޝްވަރާ ކުރެވުނު މައްސަލަތަކުގައި އެއްބާރުލުން އިތުރުކުރާނެ ކަމުގެ ދެއްވައިފައެވެ. އަދި ކުރިޔަށް އޮތް ތަނުގައި ދެ ގައުމުގެ ގުޅުން އިތުރަށް ބަދަހި ކުރުމަށް ޓަކައި މަސައްކަތްކުރާނެ ކަމުގެ ޔަގީންކަން ދެ ލީޑަރުން ވެސް ދެއްވިއެވެ.
