ހަތަރުފުރޮޅުލީ އުޅަނދު ޕާކުކުރުމަށް ހުޅުމާލެއިން ބިމެއް ހަމަޖައްސައިފިއެވެ.
ހަތަރުފުރޮޅުލީ އުޅަނދު ޕާކުކުރުމަށް ހުޅުމާލެއިން ހަމަޖައްސާފައިވަނީ ހުޅުމާލެ ސަހަރާ މިސްކިތް ކުރިމައްޗަށް އޮތް ބިމެވެ. 90،000 އަކަފޫޓުގެ މި ބިމުގެ 50،000 އަކަފޫޓް ޚާއްސަކޮށްފައިވަނީ ޓެކްސީތައްފަދަ ހަތަރުފުރޮޅުލީ ވެހިކަލްތަކަށެވެ. އަދި 40،000 އަކަފޫޓްގެ ސަރަޙައްދު ޚާއްސަކޮށްފައިވަނީ ހުޅުމާލެ މަގުތަކުގައި ޤަވައިދާ ޚިލާފަށް ޕާކްކޮށްފައި ހުންނަ ވެހިކަލްތައް ޓޯ ކުރުމަށްފަހު ގެނެސް ބެހެއްޓުމަށެވެ.
ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން ވިދާޅުވީ ކުރިއަށް އޮތް 2 ދުވަހުގެ ތެރޭގައި އެ ބިމުގައި ޕާކްކުރުމުގެ ފުރުޞަތު ލިބޭނެކަމަށެވެ. ޕާކު ކުރުމަށް ހުޅުވާލުމުގެ ކުރިން މިހާރު އަންނަނީ އެ ބިން ސާފުކޮށް، ބިންގަނޑު އެއްވަރުކުރުމުގެ މަސައްކަތްތައް ކުރަމުން ކަމަށް މިނިސްޓަރ ވިދާޅުވިއެވެ.
މިނިސްޓަރު އިތުރަށް ވިދާޅުވީ، އެބިމުގައި ޕާކު ކުރުމުގެ އިންތިޒާމުތައް ހަމަޖައްސަނީ ހުޅުމާލޭގައި އަޅާ ޕާކިން ބިލްޑިންގުތަކުގެ މަސައްކަތް ނިމެންދެން ކަމަށެވެ.
ޕާކިންގެ މައްސަލައަށް ހައްލެއް ހޯދުމަށް ކުރަމުންދާ މަސައްކަތްތަކަށް އަލިއަޅުވާލައްވަމުން ވަޒީރު ވިދާޅުވީ މާލެ ސަރަހައްދުގައި ހުސްކޮށް އޮތް ބިންތަކުގައި ވަގުތީގޮތުންނަމަވެސް ޕާކްކުރެވޭނެ އިންތިޒާމް ހަމަޖެއްސުމަކީ މުހިއްމުކަމަކަށްވާތީ އެކަން ކުރުމުގެ މަސައްކަތްތައްވެސް ކުރައްވަމުންގެންދަވާކަމަށެވެ.
