ހުޅުމާލޭ ދެވަނަ ފިޔަވަހީގައި ސާފުތާހިރުކަމުގެ މިންގަނޑާ ޚިލާފަށް ހިންގާ ހަ ކެފޭއެއް ބަންދުކުރުމަށް ނޯޓިސްދީ، ވިސާ ނެތި މަސައްކަތްކުރި ހަތަރު ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
މޯލްޑިވްސް އިމިގްރޭޝަނުން ވިދާޅުވީ ޤަވާއިދާ ޚިލާފަށް އުޅޭ ބިދޭސީން ބަލައި ފާސްކުރުމަށް ކުރަމުންދާ މަސައްކަތުގެ ތެރެއިން، އޮގަސްޓު 22 ވަނަ ދުވަހު ހުޅުމާލެ ދެވަނަ ފިޔަވަހީގައި ހިންގަމުންދާ 8 ކެފޭއެއް ޓާސްކްފޯހުން ބަލައި ފާސްކޮށްފައިވާ ކަމަށެވެ. މި އޮޕަރޭޝަންގައި އިމިގްރޭޝަނުގެ އިތުރުން، ފުލުހުންނާއި، އިކޮނަމިކް މިނިސްޓްރީއާއި އެމްއެފްޑީއޭގެ އިތުރުން އެޗްޕީއޭއިން ވެސް ބައިވެރިވިއެވެ.
މި އޮޕަރޭޝަންގައި ބަލައި ފާސްކުރި ތަންތަނުގައި ސައްޙަ ވިސާ ނެތި މަސައްކަތް ކުރަމުންދިޔަ 04 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެނެސްފައިވާކަމަށް އެއިދާރާއިން ވަނީ ވިދާޅުވެފައެވެ.
ގަވާއިދާ ޚިލާފަށް ރެޖިސްޓްރީނުކޮށް، އަދި ސާފުތާހިރުކަމުގެ މިންގަނޑުން ބޭރުން ބާކޯތަކެތި ތައްޔާރުކޮށް، އެއިން ވިޔަފާރިކުރާ މީހުންގެ މައްސަލަ ވަނީ ވަރަށް ބޮޑުވެފައެވެ. މި މައްސަލަ ފެންމަތިވީ ގަވާއިދާ ޚިލާފަށް ރާއްޖޭގައި ވިޔަފާރިކުރާ ބިދޭސީން ހޯދައި، އެ މީހުންނަށް ފިޔަވަޅު އެޅުމަށް އިމިގްރޭޝަނުން އޮޕަރޭޝަންތަކެއް ހިންގަން ފެށުމާ އެކުގައެވެ.
ބިދޭސީން ޤަވާއިދާ ޚިލާފަށް ވިޔަފާރި ކުރާތަންތަނާއި ރަށްކާތެރިކަމުގެ މިންގަނޑަށް ނުފެތޭ ގޮތަށް ކާބޯތަކެތި އުފައްދާތަންތަން ރެއިޑްކޮށް ޤަވާޢިދާ ޚިލާފަށް އުޅޭ ބިދޭސީން ދެނެގަނެ އިމިގްރޭޝަންގެ ބެލުމުގެދަށަށް ގެންގޮސް އެމީހުން ޑީޕޯޓްކުރުމުގެ މަސައްކަތް ދަނީ ކުރަމުންނެވެ.
