ފެނަކައިން ވަނީ 4 މަޝްރޫއެއް ހިންގާނެ ބަޔަކު ހޯދަން އިއުލާން ކޮށްފިއެވެ.
މިގޮތުން ށ. މާއުނގޫދޫގެ އޮފީސް އިމާރާތުގެ މަސައްކަތާއި، ހއ. ދިއްދޫ، ޏ. ފުވައްމުލަށް އަދި ހދ. ކުޅުދުއްފުށީގައި އިމާރާތްކުރަމުން ގެންދާ އިންޖީނު ގެތަކުގައި ނުނިމިހުރި މަސައްކަތްތައް ކުރާނެ ބަޔަކު ހޯދުމަށް ވަނީ އިއުލާން ކޮށްފައެވެ.
އިންހައުސްކޮށް ނުވަތަ (ފެނަކައިގެ މުވައްޒަފުން) ބޭނުންކޮށްގެން ތަކެތި ކުއްޔަށް ނަގައިގެން މަސައްކަތް ކުރުމުގެ ބަދަލުގައި ބަޔަކާ ހަވާލުކޮށްގެން އެ މަސައްކަތްތައް ކުރުމުން ބޮޑުތަނުން ޚަރަދު ކުޑަވެފައި ލުއިފަސޭހަވެގެންދާނެ ކަމަށް ފެނަަކައިން ބުނެއެވެ.
ފެނަކައިން ބަޔަކާއި ހަވާލުކޮށްގެން ހިންގުމައް އިއުލާނުކުރި 4 މަޝްރޫއަކީ ވެސް މިދިޔަ މެނޭޖްމަންޓުން އިންހައުސްކޮށް ނުވަތަ (ފެނަކައިގެ މުވައްޒަފުން) ބޭނުންކޮށްގެން ކުރިއަށް ގެންދަމުންދިޔަ ހަތަރު ޕްރޮޖެކްޓު ކަމަށާއި އެހެންނަމަވެސް އެކަން ކޮށްފައިވަނީ ކުންފުންޏަށް ގެއްލުންވާ ގޮތަށް ނުއަގުގައި ކަމަށް ވެސް ފެނަކައިން ބުނެއެވެ.
ފެނަކަ އަކީ ރައްޔިތުންނަށް އަސާސީ ހިދުމަތް ފޯރުކޮށްދެމުން އަންނަ ކުންފުންޏަކަށްވާއިރު، އެ ކުންފުނީގެ މެނޭޖްމަންޓުން އަބަދުވެސް މަސައްކަތް ކުރަމުން ދަނީ، ރައްޔިތުންގެ އިތުބާރު ލިބިފައިވާ އަދި ރައްޔިތުންނަށް އެދެވޭ ހިދުމަތެއް ދެވޭ ކުންފުންޏަކަށް، ފެނަކަ ވެގެންދިއުމަށް ކަމަށް އެ ކުންފުނީގެ މިހާރުގެ މެނޭޖްމަންޓުން އަބަދުވެސް ފާހަގަކުރެއެވެ.
