މާލޭގެ ފަޅު ގެއެއްގައި ރޭ ހިނގި އަލިފާނުގެ ހާދިސާއާ ގުޅިގެން ކައިރި ގެތަކުން ޖުމްލަ 48 މީހުން އެހެން ތަންތަނަށް ގެންދިޔަ ކަމަށް ނޭޝަނަލް ޑިޒާސްޓާ މެނޭޖްމަންޓު އޮތޯރިޓީ (އެންޑީއެމްއޭ) އިން ބުނެފިއެވެ.
މ. އޯކިޑް ޕްލާޒާގޭގައި ޖަމާކޮށްފައި ހުރި ކުނިތަކެއްގައި ރޯވެ، އަލިފާނުގެ ހާދިސާއެއް ހިނގާފައި ވަނީ ރޭގެ މެންދަމު 3:30 ހާއިރުއެވެ. އަދި ސިފައިންގެ ފަޔާ އެންޑް ރެސްކިއު ޓީމުގެ މަސައްކަތަުން އަލިފާންގަނޑު އެއްކޮށް ނިއްވާލެވުނީ ފަތިހު 4:50 ހާއިރުއެވެ.
މި ހާދިސާ އާއި ގުޅިގެން ނޭޝަނަލް ޑިޒާސްޓާއިން ބުނީ އަލިފާނުގެ ހާދިސާ ހިނގި ގޭގެ ކައިރި ހުރި ގެތަކުން 48 މީހަކު އިވަކުއޭޓް (ހުސްކޮށްފައިވާ) ކަމަށެވެ. އޭގެ ތެރޭގައި 15 ކުޑަކުދިން ހިމެނޭކަމަށްވެސް އެ އޮތޯރިޓީން ވަނީ ބުނެފައެވެ.
