ކުޅުދުއްފުށީ ކައުންސިލުން އެސިޓީގައި ވިޔަފާރި ތަރައްޤީ ކުރުމަށް ބޭނުންވާ ފަރާތްތަކަށް އެހީދޭ ސްކީމެއް ތަޢާރަފްކޮށްފިއެވެ. އެއްލައްކަ ރުފިޔާއާއި ހަމަޔަށް ފައިސާ ލިބޭ މި ސްކީމަކީ “މަސައްކަތްތެރިންނާއި ކުދިވިޔަފާރިތަކުގެ ފައިނޭންސިން ސްކީމް“ގެ ނަމުގައި ތައާރަފްކުރި ސްކީމެކެވެ. މިއީ ކުޅުދުއްފުށި ސިޓީގައި މަސައްކަތްތެރިން އިތުރުކުރުމަށާއި، އަލަށް ވިޔަފާރި ފެށުމަށް ހިތްވަރު ދިނުމާއެކު ކުދި ވިޔަފާރިތައް ފުޅާކުރުމަށް އެހީތެރިވުމުގެ މަޤްސަދުގައި ހިންގާ ސްކީމެއްކަމަށް ސިޓީގެ ކައުންސިލުން ވިދާޅުވެއެވެ.
ކުޅުދުއްފުށީ ކައުންސިލުން އެކުލަވާލި ކުދި ވިޔަފާރިތަކުގެ ފައިނޭންސިންގް އުސޫލުގައި ބުނެފައި ވަނީ:
ސްކީމްގެ ދަށުން ފައިސާ ދޫކުރުމަށް ނިންމާފައި ވަނީ ކުޅުދުއްފުށީގައި އަމިއްލަ ވިޔަފާރި ކުރާ ފަރާތްތަކަށާއި ކުޅުދުއްފުށީގައި އަލަށް ވިޔަފާރި ފަށާ ފަރާތްތަކަށެވެ. މީގެ އިތުރުން ކުޅުދުއްފުށީގައި ރަޖިސްޓްރީ ކޮށްގެން ހިންގާ ކުދި ވިޔަފާރިތަކަށެވެ. އެ ކައުންސިލުން ވިދާޅުވީ ސްކީމްގެ 50 ޕަސެންޓު ޚާއްސަ ކުރެވިފައިވަނީ އަންހެނުންނަށް ކަމަށެވެ. ނަމަވެސް ކަނޑައެޅިފައިވާ ޕަސެންޓަށް އަންހެނުން ސްކީމަށް އެދި ހުށަހަޅާފައި ނުވާނަމަ ފިރިހެނުންގެ ތެރެއިން އެ ފުރުސަތަށް އެދި ހުށަހަޅާ ފަރާތްތަކަށް އެ ފުރުސަތު ދެވޭނެ އެވެ.
މި ސްކީމްގެ ދަށުން 19 ދާއިރާއަކަށް ސްކީމް ދޫކުރުމަށް ވަނީ ހަމަޖެހިފައެވެ. އޭގެ ތެރޭގައި އަމިއްލަ އުފެއްދުންތަކާއި، ރޭނުމާއި ވަޑާމުގެ މަސައްކަތްތައް، ފެހުން، އަތްތެރި މަސައްކަތް، އިވެންޓް މެނޭޖްމެންޓު، ފަތުރުވެރިކަމުގެ ސިނާއަތް، ކާބޯތަކެތި އުފެއްދުން، ފޮޓޯގްރަފީއާއި ދަނޑުވެރިކަމުގެ އިތުރުން ކުޅިވަރު އަދި ފިޓްނަސް ހިމެނެއެވެ. މިސްކީމްގައި ބައިވެރިވާން އެދޭ ފަރާތްތަކަށް އެ ފުރުސަތު އަންނަމަހުގެ 15 ދުވަހާއި ހަމައަށް ވަނީ ހުޅުވާލާފައެވެ.
ސްކީމާއި ގުޅޭ ގޮތުން މަޢުލޫމާތު ދިނުމަށް ދެ ޝެޝަނެއް ބޭއްވުމަށް ކުލުދުށްފުށީ ސިޓީ ކައުންސިލުން ނިންމާފައިވާއިރު އަންހެން ވިޔަފާރިވެރިންނަށް ބާއްވާ މައުލޫމާތު ދިނުމުގެ ޝެޝަން އޮންނާނީ 21 ޖުލައިގައެވެ. އަދި ފިރިހެން ވިޔަފާރިވެރިންނަށް މައުލޫމާތު ދިނުން އޮންނާނީ 22 ޖުލައިގައިކަމަށް ކުޅުއްފުށީ ސިޓީ ކައުންސިލުން ވިދާޅުވެއެވެ.
