ކަޅު ބާޒާރުގައި ޑޮލަރުގެ ވިޔަފާރި ހިންގަން އުޅުނު ދެ ބިދޭސީއަކު ހައްޔަރުކޮށް، އެކަން ކުރި އިތުރު ބިދޭސީންތަކެއް ޑީޕޯޓްކޮށްލައިފިއެވެ.
މޯލްޑިވްސް އިމިގްރޭޝަނުން ބުނީ، މާލޭގެ ޑޮލަރު އޭޓީއެމް ކައިރީގައި ޚާއްސަ ރެއިޑް އޮޕަރޭޝަނެއް ރޭ ކުރިއަށް ގެންގޮސްފައިވާ ކަމަށާއި މި އޮޕަރޭޝަންގެ ތެރެއިން އޭޓީއެމް ކައިރީ ކަޅުބާޒާރުގައި ޔޫއެސްޑޮލަރު ގަނެވިއްކަން އުޅުނު ދެ ބިދޭސީއަކު އެ އިދާރާގެ ބެލުމުގެ ދަށަށް ގެންގޮސްފައިވާކަމަށެވެ.
އިމިގްރޭޝަނުން މި އޮޕަރޭޝަން ހިންގާފައި ވަނީ ފުލުހުންނާއި ގުޅިގެންނެވެ. މީގެ އިތުރުން ވެސް އިމިގްރޭޝަނުން ދަނީ ފުލުހުންނާއި ގުޅިގެން ގަވާޢިދާ ޚިލާފަށް ރާއްޖޭގައި ވިޔަފާރިކުރާ ބިދޭސީން ހޯދުމަށް ޚާއްސަ އޮޕަރޭޝަނެއް ހިންގަމުންނެވެ.
އިމިގްރޭޝަނުން މިދިޔަ މާޗް މަހު ހިންގި ޚާއްސަ އޮޕަރޭޝަނެއް ގެ ތެރެއިންވެސް އަތުލި ހަ ބިދޭސީއަކު މިހާރު ޑީޕޯޓްކޮށްލާފައިވާ ކަމަށް އެއިދާރާއިން ހާމަކުރެއެވެ.
ރާއްޖޭގައި ގަވާއިދާ ޚިލާފަށް އުޅޭ ބިދޭސީން ކަޅުބާޒާރުގައި ޑޮލަރު ވިއްކަމުން ދާކަމުގެ ޝަކުވާއާއި ކަންބޮޑުވުން އާއްމުން އަންނަނީ ފާޅުކުރަމުންނެވެ. ގަވާއިދާ ޚިލާފަށް އުޅޭ ބިދޭސީންގެ މި މައްސަލަ ހައްލުކުރުމަށް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ގެންގުޅޭ ސިޔާސަތާ އެއްގޮތްވާ ގޮތުގެ މަތިން ކުރިއަށް އޮތް ތަނުގައިވެސް މި އޮޕަރޭޝަންތައް އިތުރަށް ފުޅާކޮށް، ގަވާއިދާ ޚިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދުމަކީ އިމިގްރޭޝަންގެ އެންމެ ބޮޑު އަމާޒު ކަމަށް އެ އިދާރާއިން ބުނެއެވެ.
