މިފްކޯއިން މަސްވެރިންނަށް ދޭންޖެހޭ ފައިސާ މިއަދު ހަވާލު ކުރުމުގެ މަސައްކަތް ކުރަމުން އަންނަކަމަށް އެ ކުންފުނިން ބުނެފިއެވެ.
އައްޑޫ ފިޝަރީސް ކޮމްޕްލެކްސް ގައި މަސްވެރިން ކުރަމުން ދާ އިހުތިޖާޖަށް ހަފްތާއެއްވާން ގާތްވެފައިވާއިރު ފައިސާ ލިބުމުން ނޫނީ އިހުތިޖާޖު ނުހުއްޓާނެ ކަމަަށް މަސްވެރިން ވަނީ ބުނެފައެވެ،
މިއަދު މިފްކޯއިން މީޑިއާތަކަށް ހިއްސާ ކުރި މެސެޖެއްގައި ބުނީ، މަސްވެރިންނަށް ދޭންޖެހޭ ފައިސާ ހަމަޖައްސުމުގެ މަސައްކަތް ސަރުކާރުން ކުރަމުން އަންނަ ކަމަށެވެ. އަދި މަސްވެރިންނަށް ނުދެވި ހުރި 52 މިލިއަން ރުފިޔާ މިއަދު ދެއްކުމުގެ މަސައްކަތް ސަރުކާރުން ކުރަމުން އަންނަ ކަމުގެ މައުލޫމާތު ލިބިފައިވާ ކަމަށް މި މެސެޖުގައި ވަނީ ބުނެފައެވެ.
އެހެން ނަމަވެސް، ރަސްމީ ޖަވާބެއް މިހާތަނަށް ލިބިފައި ނުވާ ކަން ފާހަގަކޮށް މިފްކޯ އިން ބުނީ އެ ފައިސާ ހަމަޖެއްސުމަށްފަހު ސަރުކާރުން އިއުލާން ކުރުންވެސް އެކަށީގެންވާ ކަމަށެވެ.
