މަސައްކަތުގެ މާޙައުލުގައި ހިނގާ ތަފާތުކުރުމާއި އަނިޔާވެރިކަން ނައްތާލުމަށް މަސައްކަތްކުރުމަކީ އެންމެންގެ ވާޖިބެއްކަމަށް މަތީ ތަޢުލީމާއި މަސައްކަތްތެރިކަމާއި ހުނަރު ތަރައްޤީކުރުމާ ބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެއެވެ.
ވަޒީރު މިހެން ވިދާޅުވީ މިއަދު ފާހަގަކުރާ ބައިނަލްއަޤްވާމީ މަސައްކަތްތެރިންގެ ދުވަހާ ގުޅިގެން ދެއްވި ޚިޠާބުގައެވެ.
“ރާއްޖޭގެ ޤާނޫނީ އޮނިގަނޑުގެ ތެރެއިން މަސައްކަތްތެރިންނަށް ރައްކާތެރިކަމާއި ޞިއްޙީ ރައްކާތެރިކަން ކަށަވަރުކޮށްދޭ ޙައްޤުތައް މިހާރު ލިބިދީފައިވޭ. ނަމަވެސް ތަފާތުކުރުމާއި ގަނާކުރުމުގެ ހާދިސާތައް އަދިވެސް ހިނގަމުންދޭ. މިއީ ކަންބޮޑުވާންޖެހޭ ކަމެއް،” މާރިޔާ ވިދާޅުވިއެވެ.
ވަޒީފާގެ މާޙައުލުގައި ތަފާތުކުރުމާއި އަނިޔާވެރިކަމާ ދެކޮޅަށް ވަކާލާތުކޮށް، އެފަދަ ކަންކަން ހުއްޓުވުމަށް ޢަމަލީ ފިޔަވަޅުތައް އެޅުމަކީ ކޮންމެ ފަރުދެއްގެ ޒިންމާއެއް ކަމަށް އެކަމަނާ ފާހަގަކުރެއްވިއެވެ. އަދި ސަރުކާރުގެ ވިސްނުމަކީ ވެސް ތަފާތުކުރުން ނައްތާލައި އެންމެހާ މަސައްކަތްތެރިންނަށް ހަމަހަމަ ފުރުޞަތުތަކާއި ކުރިއެރުން ހޯދައިދިނުންކަމުގައި ވިދާޅުވިއެވެ.
ރާއްޖޭގައި ބައިނަލްއަޤްވާމީ މަސައްކަތްތެރިންގެ ދުވަސް ފާހަގަކުރާތާ މިއަހަރަކީ 15 ވަނަ އަހަރު ކަމަށާއި، މި ދުވަސް ފާހަގަކުރުމުގެ ބޭނުމަކީ މަސައްކަތްތެރިންގެ ޙައްޤުތައް ކުރިއެރުވުން ކަމަށް ވަޒީރު ވިދާޅުވިއެވެ.
“އަޅުގަނޑުމެން އުފާކުރަން، ވޭތުވެދިޔަ 15 އަހަރު ރާއްޖޭގެ މަސައްކަތްތެރިންގެ ޙައްޤުތައް ރައްކާތެރިކުރުމުގައި ވަރަށް ބޮޑެތި ކުރިއެރުންތަކެއް ލިބިފައިވާތީ. އެކަމަކު މިއަދުގެ ޝިޢާރުގައި ވާ ފަދައިން، މި ބަދަލުވަމުންދާ ދުނިޔޭގައި، މަސައްކަތުގެ ރައްކާތެރިކަން އިތުރަށް ކަށަވަރުކުރަން އެބަޖެހޭ،” މާރިޔާ ވިދާޅުވިއެވެ.
މަސައްކަތްތެރިންގެ ޙައްޤުތަކުގެ ޤާނޫނީ ރައްކާތެރިކަން ވުޖޫދުކޮށްދީ، ޢަމަލީ ގޮތުން އެ ޙައްޤުތައް ކަށަވަރުކުރުމަށް ސަރުކާރުން މަސައްކަތްކުރަމުންދާކަން ފާހަގަކުރައްވައި، އެންމެހާ ދިވެހި މަސައްކަތްތެރިންނަށް ޤާނޫނުތަކުގެ ހިޔާވަހިކަން ލިބިގެންދާނެ ކަމުގެ ޔަޤީންކަން ވަޒީރު ވަނީ ދެއްވާފައެވެ.
ބައިނަލްއަޤްވާމީ މަސައްކަތްތެރިންގެ ދުވަހުގެ މުނާސަބަތުގައި ރާއްޖޭގެ އެންމެހާ މަސައްކަތްތެރިންނަށް ވަޒީރު ޑރ. މަރްޔަމް މާރިޔާ ތަހުނިޔާ ވިދާޅުވިއެވެ. އަދި މަސައްކަތްތެރިންގެ ޙައްޤުތައް ހޯދައިދިނުމަށް ކުރަމުންދާ މަސައްކަތުގައި ފަރުދީ ގޮތުންނާއި ޤައުމީ ފެންވަރުގައި އެއްބާރުލުން ދެއްވުމަށް އެދިވަޑައިގެންނެވިއެވެ.
