ރާއްޖޭގެ މޫސުން ގޯސްވަމުންދާ ކަމަށާއި، ދެކުނުގެ އަތޮޅުތަކަށް ވެސް ބޯކޮށް ވާރޭވެހި ގުގުރާނެ ކަމަށް މޯލްޑިވްސް މީޓިއޮރޮލޮޖިކަލް ސާރވިސް (މެޓް އޮފީސް) އިން ވަނީ އިންޒާރު ދީފިއެވެ.. މިގޮތުން، ގއ. އަތޮޅުން ފެށިގެން އައްޑޫ ސިޓީ ހިމެނޭ ސަރަހައްދަށް ޔެލޯ އެލާޓެއް ވަނީ ނެރެފައެވެ.
މީގެ ކުރިން، ހއ. އަތޮޅުން ފެށިގެން ވ. އަތޮޅާ ހަމައަށް ހިމެނޭ ރަށްތަކަށް ބޯކޮށް ވާރޭވެހުމުގެ ލަފާ މެޓް އޮފީހުން ދީފައިވެއެވެ. ފަހުން ނެރުނު އިންޒާރުގައި ވަނީ، ދެކުނު ސަރަހައްދުގައި ވެސް މޫސުން ގޯސްވާނެކަމުގެ މައުލޫމާތު ހިމަނާފައެވެ.
މާދަމާގެ ނިޔަލަށް އެކި ހިސާބުތަކަށް ވިއްސާރަ ކުރުމާއެކު ގުގުރާނެ ކަމަށާއި، ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށް މޫސުމާބެހޭ މައުލޫމާތު ދޭ އިދާރާއިން ބުނެފައިވެއެވެ. އަދި ހުޅަނގާއި ހުޅަނގު އުތުރު ދިމާއިން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައި ދައުރުވާނެ ކަމަށާއި، ވިލާގަނޑުގައި ގަޑިއަކު 35 މޭލާ ހަމައަށް ވައި ގަދަވެދާނެ ކަމަށް ލަފާކުރެވެއެވެ.
މިފަދަ މޫސުމީ ހާލަތެއްގައި، ރާއްޖޭގެ ކަނޑު އާދައިގެ ވަރަކަށް ގަދަވެފައި، ބައެއް ސަރަހައްދުތަކުގައި ވިލާގަޑު އަރަން ފެށުމުން ކަނޑުގަދަވުމަކީ އެކަށީގެންވާ ކަމެކެވެ.
ރާއްޖޭގައި މޫސުން ގޯސްވަމުންދާއިރު، ރަށްރަށުގައި ދިރިއުޅޭ ފަރާތްތަކާއި، ކަނޑު މަގުން ދަތުރުކުރާ އުޅަނދުފަހަރުގެ ސަލާމަތަށް ސަމާލުވުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ. މޫސުން ގޯސްވުމާ ގުޅިގެން، ރާއްޖޭގެ އެކި ސަރަހައްދުތަކުގެ މޫސުމާ ބެހޭ މައުލޫމާތު ގަވައިދުން ބަލައި، ކުއްލި ހާލަތްތަކަށް ތައްޔާރަށް ތިބުމުގެ މުހިންމުކަން ފާހަގަކުރެވެއެވެ.
