ރާއްޖޭގެ މިނިވަންކަމާއި، އިސްތިގުލާލަށް ޗައިނާއިން އަބަދުވެސް އިހްތިރާމް ކުރާނެ ކަމަށް ޗައިނާގެ ނޭޝަނަލް ޕީޕަލްސް ކޮންގްރެސްގެ ސްޓޭންޑިންގ ކޮމިޓީގެ ޗެއާމަން ޖަންގ ދާ ޖިއާންގ ވިދާޅުވެއްޖެއެވެ.
އޭނާ މިހެން ވިދާޅުވީ ރައީސް އަބްދުﷲ ޔާމީން އަބްދުލްގައްޔޫމާ މިއަދު ބައްދަލު ކުރައްވައި ދެއްކެވި ވާހަކައިގައެވެ. ޗައިނާއިން ރާއްޖޭގެ ދާޚިލީ ކަންކަމުގެ ތެރެއަށްވެސް ނުވަންނާނެ ކަމުގެ ޔަގީންކަން އޭނާ ދެއްވިއެވެ.
އޭނާ ވިދާޅުވީ ޗައިނާއާއި ރާއްޖެއާ ދެމެދު އިއްޔެ ސޮއިކުރެވުނު އެއްބަސްވުންތަކާއެކު ވިޔަފާރީގެ ދާއިރާއިން އިތުރު ފުރުސަތުތައް ހުޅުވި، ދިވެހިރާއްޖެއާއި ޗައިނާއާ ދެމެދު އޮތް ގުޅުން އިތުރަށް ބަދަހިވެގެން ދިއުމަށް މަގުފަހިވެގެންދާނެ ކަމަށެވެ.
ޗައިނާއާއި ދިވެހިރާއްޖެއާ ދެމެދުއޮތީ ކުދި ގައުމަކާއި ބޮޑު ގައުމަކާ ދެމެދުވެސް ވަރުގަދަ ގުޅުމެއް ބޭއްވިދާނެ ކަމުގެ ނަމޫނާ ގުޅުމެއް ކަމަށްވެސް އެ ބައްދަލުވުމުގައި އޭނާ ވިދާޅުވިއެވެ.
ދިވެހިރާއްޖެއާއި ޗައިނާއަކީ ސަރަހައްދުގެ ގޮތުން ނުވަތަ އާބާދީގެ ގޮތުން ނުވަތަ ބޮޑު ކުޑަ މިނުގެ ގޮތުން ތަފާތު ދެގައުމަށް ވިޔަސް ދެގައުމުގެ ދެމެދު އޮތް ގާތް ގުޅުމަކީ ބޮޑެތި ގައުމުތަކާއި ކުދި ގައުމުތަކާ ދެމެދުގައިވެސް ވަރުގަދަ ގުޅުމެއް ގގާއިމް ކުރެވިދާނެ ކަމުގެ ލާމަސީލު ނަމޫނާއެއް ކަމަށްވެސް ވިދާޅުވިއެވެ.
