ކުރިއަށް އޮތް ތިން ދުވަހު ވެސް ރާއްޖެއަށް ވިއްސާރަ ކުރާނެކަމަށް މެޓް އޮފީހުން ބުނެފިއެވެ.
މެޓުން ބުނީ ކުރިއަށް އޮތް 24 ގަޑިއިރު ރާއްޖޭގެ އުތުރާއި މެދުރާއްޖެ ތެރޭގެ ރަށްތަކަށް ބޯކޮށް ވާރޭވެހޭނެ ކަމަށް ލަފާކުރެވޭ ކަމަށެވެ. އަދި ރާއްޖޭގެ ކަނޑުތައް ގަދަވާނެކަމަށް ލަފާކޮށ ްމޫސުމަށް ސަމާލުކަން ދިނުމަށް މެޓުން ވަނި އިލްތިމާސްކޮށްފައެވެ.
މީގެ އިތުރުން މެޓުން ބުނީ މިހާރު ރާއްޖެއަށް މި ކުރަނީ ހުޅަނގު މޫސުމުގެ ވިއްސާރަ ކަމަށެވެ. މި ދުވަސްވަރު އަރަބި ކަނޑުގައި ވަރުގަދަ ތޫފާނެއް އުފެދިފައި ވީ ނަމަވެސް، އޭގެ އަސަރު ރާއްޖެއަށް ނުކުރާނެ ކަމަށެވެ.
ރާއްޖޭގެ މުސުން ގޯސްވުމާ ގުޅިގެން ފުލުހުން ވަނީ މި ދުވަސްވަރު ވައިގަދަވާނެތީ ސިނަމާލެ ބްރިޖާއި މާލެ-ހުޅުމާލެ ހައިވޭ ހުރަސްކޮށް ދަތުރުކުރާ މީހުން ވެސް ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ.
