ދިވެހިރާއްޖޭގެ ފަތުރުވެރިކަން ކުރިއެރުވުމުގައި ސަރުކާރުން އެންމެ ބޮޑު އަހަށްމިއްޔަތެއް ދެނީ އާއްމުންނާއި ފަތުރުވެރިންގެ ރައްކާތެރިކަން ކަށަވަރު ކުރުމަށް ކަމަށް މިނިސްޓަރ އޮފް ޓޫރިޒަމް ޑރ. އަބްދުﷲ މައުސޫމް ވިދާޅުވެއްޖެއެވެ.
އިންޓަރނޭޝަނަލް މޯލްޑިވްސް ޓްރެވަލް މާކެޓް (އައިއެމްޓީއެމް) ފެއަރ ހުޅުވުމުގެ ރަސްމިއްޔާތު ޝަރަފްވެރިކޮށްދެއްވާ ދެއްކެވި ވާހަކަފުޅުގައި ޓޫރިޒަމް މިނިސްޓަރ ވިދާޅުވީ ކޮވިޑް-19ގެ ސަބަބުން ރާއްޖޭގެ ބޯޑަރު ބަންދުކުރުމަށް ފަހު އަލުން ހުޅުވުމުން މިހާރު ރާއްޖެ އަންނަ ފަތުރުވެރިންގެ އަދަދު އަންނަނީ އިތުރުވަމުން ކަމަށާއި އެގޮތުން ބޯޑަރު ހުޅުވިފަހުން މިހާތަނަށް 50،000 އަށް ވުރެ ގިނަ ފަތުރުވެރިން ދިވެހިރާއްޖެއަށް ޒިޔާރަތްކޮށްފައިވާ ކަމަށެވެ.
މީގެ އިތުރުން ޓޫރިޒަމް މިނިސްޓަރ ދެއްކެވި ވާހަކަފުޅުގައި ވިދާޅުވިގޮތުގައި ރާއްޖެއަކީ އިގުތިސާދީ ގޮތުން ފަތުރުވެރިކަމަށް ބަރޯސާވެފައިވާ ގައުމަކަށްވާއިރު، ކޮވިޑް-19ގެ މި ހާލަތުގައި ރާއްޖޭގެ ބޯޑަރުތައް ހުޅުވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ނިންމެވި ނިންމެވުމަކީ މުހިއްމު ނިންމެވުމެކެވެ. އަދި ފަތުުރވެރިންނަށް ބޯޑަރުތައް ހުޅުވާލި މަދު ގައުމުތަކުގެ ތެރޭގައި ރާއްޖެ ހިމެނޭއިރު، މިއީ ރާއްޖޭގެ ފަތުރުވެރިކަން ކުރިއަރުވަން ލިބިގެންދާ ފުރުސަތެއްގެ ގޮތުގައި ދެކެންޖެހޭ ކަމަށްވެސް ޓޫރިޒަމް މިނިސްޓަރ ވިދާޅުވިއެވެ.
އެގޮތުން ފެތުރެމުންދާ ކޮވިޑް-19ގެ ސަބަބުން ފަތުރުވެރިކަން އިޝްތިހާރުކުރުމަށް ރާއްޖެއިން ތަފާތު ގޮތްތަކެއް ހޯދަން ޖެހިފައިވާކަން ފާހަގަކުރައްވަމުން މިނިސްޓަރ ވިދާޅުވިގޮތުގައި އައިއެމްޓީއެމް ފަދަ ފެއަރ ތަކަކީ މުހިއްމު ފެއަރއެއް ކަމުގައެވެ.
އައިއެމްޓީއެމް ފެއަރ ތައް މީގެ ކުރިންވެސް 2 އަހަރެއްގައި ބާއްވާފައިވާއިރު މި ފެއަރ ގެ މައިގަނޑު މަގުސަދަކީ ރާއްޖޭގައި ފަތުރުވެރިކަމުގެ ވިޔަފާރިކުރާ ފަރާތްތަކުގެ ވިޔަފާރި ބޭރުގެ ފަރާތްތަކަށް އިޝްތިހާރުކުރުމެވެ. މިއަހަރުގެ “އައިއެމްޓީއެމް 2020″ގައި ރާއްޖޭގެ ފަތުރުވެރިކަމުގެ ވިޔަފާރި ކުރަމުން އަންނަ ލޯކަލް ގެސްޓް ހައުސްތަކާއި، ޑައިވް ސެންޓަރުތަކާއި، ލޯކަލް ޓްރެވެލް އޭޖެންސީތަކާއި، ޓުއަރ އޮޕަރޭޓަރުން އަދި ރާއްޖޭގައި ހިންގާ ރިސޯޓުތަކުން ވަނީ ބައިވެރިވެފައެވެ.
