ޕަބްލިކް ސާވިސް މީޑިއާ (ޕީއެސްއެމް) ގެ ލައިވް ޕްރޮގްރާމް ތަކަށް ރާއްޖޭގެ ޝައިޚުން ނޭރުވުމަށް އަންގާފައި ނުވާނޭ ކަމަށް ރައީސުލްޖުމުހޫރިއްޔާގެ އޮފީހުގެ ތަރުޖަމާނު އިބްރާހިމް ހޫދު ވިދާޅުވެއްޖެއެވެ.
ހޫދު މިގޮތަށް ވިދާޅުވެފައި މިވަނީ ރާއްޖޭގެ ބައެއް މީޑިޔާތަކުގައި ޕީއެސްއެމް ގެ ލައިވް ޕްރޮގްރާމް ތަކަށް ޝައިހުން ނާރުވަން ރައީސް އޮފީހުން އަންގާފައިވާ ކަމަށް ބުނެ އަޑުފަތުރާފައިވާ ދަނޑިވަޅެއްގައި އެވެ. މިކަމާއި ގުޅިގެން ގިނަ ރައްޔިތުން ދަނީ ސަރުކާރަށް ފާޑުކިޔަމުންނެވެ.
އެމްޑީއެންގެ މައްސަލާގައި ދީނީ އިލްމުވެރިންނާއި ރައްޔިތުންގެ ކަންބޮޑުވުން ފާޅުކުރަމުންދާ މި ދަނޑިވަޅުގައި ރައީސް އޮފީހުން އެފަދަ ވާހައެއް ދެއްކުމުން އިތުރަށް ރައްޔިތުންގެ މެދުގައި ސަރުކާރަށް ކުރާ އިތުބާރު ޔަގީންކަން ގެއްލިގެން ދާނެ އެވެ.
ސަރުކާރުން ރައްޔިތުންގެ އަޑު އަހައި މިހާތަނަށް އެމްޑީއެން އާއި ދެކޮޅަށް އެޅިހާ ވެސް ފިޔަވަޅަކީވެސް އެމްޑީއެން ސަސްޕެންޑް ކުރުމެވެ. ނަމަވެސް މި ފިޔަވަޅު އެޅުމަށް ފަހުގައިވެސް ސަރުކާރުގެ ބައެއް ފަރާތްތަކުން ދަނީ އެމްޑީއެން ގެ ދިފާއުގައި އެކި ފަހަރު އެކި ގޮތް ގޮތަށް ވާހަކަތައް ދައްކާފައެވެ.
