މާފުށީ ޖަލުގެ ހާލަތު ބައްލަވާލެއްވުމަށް ހޯމް މިނިސްޓަރ ޝައިޚް އިމްރާން ޢަބްދުﷲ އެ ޖަލަށް މިއަދު ވަޑައިގެންފިއެވެ. މިނިސްޓަރ ޖަލަށް ވަޑައިގެންނެވި އިރު މިދިޔަ ބުރާސްފަތި ދުވަހު ހަވީރު މާފުށީ ޖަލުގައި ވަނީ ހަމަނުޖެހުން ހިނގާ ބައެއް ގައިދީންނަށާއި ކަރެކްޝަންސްގެ އޮފިސަރުންނަށް ވަރަށް ބޮޑަށް އަނިޔާވެފައެވެ.
ހޯމް މިނިސްޓްރީ އިން ވިދާޅުވީ މި ދަތުރުގައިި ޖަލުގެ ހާލު ދެނެގަނެ، ހަމަނުޖެހުމުގައި ކަންކަން ހިނގާދިޔަގޮތް މިނިސްޓަރ ބައްލަވާނެ ކަމަށެވެ. އެގޮތުން މިނިސްޓަރ ގެންދަވަނީ ޖަލުގެ އިސް އޮފިސަރުންނާ ބައްދަލުކުރަމުންނެވެ.
މި ހާދިސާ އާއި ގުޅިގެން ރޭ ކުރެއްވި ޓްވީޓެއްގައި މިނިސްޓަރު އިމްރާން ވިދާޅުވީ ގައިދީންނާމެދު ހިނގާ ލާއިންސާނީ ދަށު ދަރަޖައިގެ އަމަލުތައް ހިންގުން ހުއްޓުވާނެ ކަމަށާއި ނަމަވެސް ފުރިހަމަ ތަހުގީގަކާ ނުލައި އޮފިސަރުންނަށް ފިޔަވަޅެއް ނާޅާނެ ކަމަށެވެ.
“ފުރިހަމަ ތަޙްޤީޤަކާ ނުލައި އޮފިސަރުންނަށް ފިޔަވަޅު އެޅުމަކީ ކުރާނެކަމެއް ނޫން. ޖަލު ހަލަބޮލިކޮށްގެން ސިޔާސީ މަންފާ ހޯދުނު ޒަމާން މާޒީވެއްޖެ.” އިމްރާން ވިދާޅުވިއެވެ.
