ޔޫރަޕްގެ ޤައުމެއްކަމަށްވާ ޑެންމާކުގައި މޫނު ބުރުގާ އާއި ހިޖާބު އަޅައިގެން އާއްމު ތަންތަނުގައި ނޫޅެވޭގޮތަށް ޤާނޫނެއް ފާސްކޮށްފިއެވެ.
މިޤާނޫނަށް ޔޫރަޕްގެ އެހެން ބައެއް ޤައުމުތައްކަމަށްވާ ފްރާންސް، ޖަރުމަން، ބެއިޖިން އިންވެސް ތާއީދު ކޮށްފައި ވެއެވެ. ޑެންމާކުގެ ސަރުކާރުން މިޤާނޫން ތަސްދީގު ކުރަމުން ބުނެފައި ވަނީ މިއީ އެއްވެސް ދީނަކަށް ފުރައްސާރަ ކުރުމުގެ ގޮތުން ކުރިކަމެއް ނޫންކަމަށެވެ.
މިޤާނޫނަށް ދީފައިވާ ނަމަކީ ‘ބުރުގާ ބޭން’ އެވެ. މިޤާނޫނާއި ހިލާފްވާ ފަރާތްތައް ފުރަތަމަ ފަހަރަށް 118 ޔޫރޯއިން ޖޫރިމައިނާ ކުރާއިރު ތަކުރާރުވާ ފަރާތްތައް 1178 ޔޫރޯއިން ޖޫރިމައިނާކޮށް 6 މަސް ދުވަހަށް ޖަލަށްލުން ހިމެނެއެވެ. މީގެ އިތުރުން އެހެންމީހެއްގެ މޫނު ނިވާކުރުމަށް މަޖުބޫރު ކުރުވާ މީހެއްގެ އަދަބެއްގެ ގޮތުގައި ޖޫރިމައިނާކޮށް 2 އަހަރުގެ މުއްދަތަށް ޖަލަށްލުން ވެސް ހިމެނެއެވެ. އެކަށީގެންވާ ސަބަބަކާއި ހުރެ މޫނު ނިވާކޮށްގެން ތިބުމަށް މިޤާނޫން ހުރަސް އަޅާފައި ނުވެއެވެ. އެގޮތުން ފިނީގެ ސަބަބުންނާއި، ސައިކަލް ދުއްވާއިރު މޫނު ނިވާކުރާކުރުން ނުހިމެނެއެވެ.
މިޤާނޫން މިހާރު ތަސްދީޤް ކޮށްފައި ވީނަމަވެސް މިއަށް އަމަލުކުރަން ފަށާނީ އޯގަސްޓް މަސްތެރޭގައި ކަމަށް އެޤައުމުގެ ސަރުކާރުން ހާމަކޮށްފައި ވެއެވެ.
މީގެ ކުރިން މިފަދަ ޤާނޫނެއް ފްރާންސްގައި 2010 ވަނަ އަހަރު ފާސްކޮށްފައި ވެއެވެ. އަދި އެޤާނޫން ތަންފީޒު ކުރަންފެށުމުން އެމައްސަލަ ޔޫރަޕްގެ ހިއުމަން ރައިޓްސް ކޯޓަށް ހުށަހަޅާފައި ވެއެވެ.
