ގިނަބައެއްގެ ލޯބިން ފުރިގެން ދިޔަ އަދި އިހްތިރާމް ލިބިގެން ދިޔަ އަލީބަނަތު މިއަދު ނިޔާވެއްޖެއެވެ.
އަލީ ބަނަތު އަކީ އޮސްޓްރޭލިއާ އަށް އުފަން މުސްލިމެކެވެ. އަމިއްލަ ވިޔަފާރި އެއްކުރަމުން އައި މުއްސަނދި އަލީ ގެ ދިރި އުޅުން ބަދަލު ވެގެން ދިޔައީ 2015 ވަނަ އަހަރު ބަލިވެގެން ޑޮކްޓަރަށް ދެއްކުމުން ކެންސަރ ޖެހި އޭގެ އެންމެ ފަހު ސްޓޭޖްގައި ކަމަށް ބުނި ހިސާބުންނެވެ. އަލީ ބަނަތަށް ޖެހުނީ “އެޑެނޮއިޑް ސިސްޓިކް ކާސިނޯމާ” އެވެ. އަލީ ނިޔާވިއިރު މުޅިހަށިގަނޑަށް ވަނީ ކެންސަރ ފެތުރިފައި ކަމަށް އޭނާގެ ފޭސްބުކް ޕޯސްޓްތަކުގައި ބުނެފައި ވެއެވެ.
އުމުރުން33 އަހަރުގެ އަލީ ބަނަތަށް އަނގައިގެ ކެންސަރ ޖެހިފައި ވާކަމަށް ޑޮކްޓަރ ބުނެ އޭނާ އަށް ދީފައި ވަނީ ދިރިހުރުމަށް އެންމެ 7 މަހެވެ. އެވަގުތު އަލީ ބުނެފައި ވަނީ ކެންސަރ އަކީ މާތް ﷲ އޭނާ އަށް ދެއްވި ހަދިޔާއެއްކަމަށެވެ. އިންޓަވިއުއެއްގައި ،ހަދިޔާއެކޭ ބުނީ ކީއްވެގެންތޯ ސުވާލުކުރުން އަލީ ގިސްލަމުން ބުނެފައިވަނީ “މުޅިދިރި އުޅުން ބަދަލު ކޮށްލަން ލިބުނު ފުރުސަތަކީ މިއީ” ކަމަށެވެ އަދި އެހާ ހިސާބުން އަލީ ބޭނުންވީ މުއްސަނދި ދިރި އުޅުން ދޫކޮށްލާ ދިރި އުޅުމަށް ލިބިފައިވާ ހަތް މަސްތެރޭގައި ދުނިޔޭގެ އެކި ކަންކޮޅުތަކުގައި ތިބި ފަގީރު މީހުންނަށް ސަދަގާތް ކުރުމަށެވެ.
އަލީގެ ހަޔާތުގެ ބާކީ އޮތް ކުޑަދުވަސްކޮޅަށް އޭނާ ގެންގުޅުނު ފެރާރީ ތަކާއި އަގުބޮޑު ގަހަނާ، (ލުއިސް ވުއިޓަން) ގަޑި ، ބޫޓު. ދަބަސް ފަދަ ތަކެތި ވެސް ފަގީރުންނަށް ސަދަގާތް ކޮށްލުމަށްފަހު އޭނާ ފަގީރުންނަށް އެހީވުމަށް ޕްރޮޖެކްޓެއް ހުޅުވިއެވެ. އެމްއޭޓީޑަބްލިޔު (މުސްލިމްސް އެރައުންޑް ދަ ވޯލްޑް) ހުޅުވީ އޮކްޓޯބަރ 2015 އެފްރިކާގެ އަދި ޓޮގޯގެ ފަގީރުންނަށް އެހީވުމަށެވެ. އަދި ޗެރިޓީ މަސައްކަތަށް އޭނާ ވަނީ “ގޯފަންޑްމީ” ނަމުގައިވެސް ފަންޑްހޯދާފައެވެ.
ދުނިޔޭގެ އެކި ކަންކޮޅުތަކުގައި ތިބި މުސްލިމުންގެ ލޯތްބާއި ގަދަރު ލިބިގެން އަދި ހެޔޮ ދުޢާ އާ ލިބިެމުން ދިޔަ އަލީ 2015ވަނަ އަހަރު ބެއްލެވި ޑޮކްޓަރުން އޭނާގެ އުމުރަކީ ހަތްމަސް ކަމަށް ބުނިކަމުގައި ވިޔަސް އޭނާ ދުނިޔެ ދޫކޮށްފައި ވަނީ މިއަދުގެ ވަގުތެއްގައެވެ. އަލީ ނިޔާވުމުން އެފަދަ ރަނގަޅު ނަމޫނާ އެއް ދެއްކި މީހަކު ނެތް ކަމަށާއި އެހާޅައުމުރުގައި އެފަދަ މީހަކު ދުނިޔެދޫކުރުމުން ވަރަށްގިނަ މުސްލިމުން މިއަދު އަލީގެ ފޭސްބުކް ޕޭޖްގައި ދަނީ ހިތާމަފާޅުކުރަމުންނެވެ.
“އޭއޯ ނިއުސް” ގެ ޓީމުންނާއި ކިޔުންތެރިންގެ ދުއާ އަކީވެސް އަލީބަނަތަށް ހެޔޮ ރަހުމަތް ލައްވާ ސުވަރުގޭގެ ދާއިމީ ނިއުމަތް މިންވަރު ކުރެއްވައި، އާއިލާ އަށް ކެތްތެރިކަން ދެއްވުމެވެ. އާމީން.
