ޝަރަފުއްދީން ސްކޫލުގެ “ސްކޫލް މީޑިއާ” ރަސްމީކޮށް އިފްތިތާޙްކޮށްފިއެވެ. “އޭއޯ ނިއުސް” ގެ ފަރާތުން އައްޑޫގެ ހުރިހާ ސްކޫލެއްގައި ގާއިމު ކުރާ ސްކޫލް މީޑިއާ ޕްރޮގްރާމުގެ ދަށުން ޝަރަފުއްދީން ސްކޫލުގެ ސްކޫލް މީޑިއާގެ ފަށާފައިވަނީ މިއަދުއެވެ.
ސްކޫލް މީޑިއާ ޕްރޮގްރާމަކީ ސްކޫލުތަކުގައި ހިންގާ ހަރަކާތްތައް އެސްކޫލެއްގެ ދަރިވަރުން އަމިއްލަ އަށް ކަވަރޭޖް ހަދައި މީޑިއާއަށް ފޮނުވުމުގެ މަސައްކަތް ކުރާނެ ގޮތް ދަސްކޮށްދީ ނޫސްވެރިކަމުގެ ދާއިރާއަށް ސްކޫލުތަކުގެ ދަރިވަރުން އަހުލުވެރިކުރުމުގެ މަގުސަދުގައި ހިންގާ ޕްރޮގްރާމެކެވެ. އޭއޯ ނިއުސް ގެ ފަރާތުން ހިންގާ މި ޕްރޮގްރާމުގައި ސްކޫލް މީޑިއާގެ ދަރިވަރުންނަށް ބޭނުންވާ އެހީތެރިކަން އޭއޯނިއުސް އިން ދޭނެއެވެ. މިގޮތުން މި ޕްރޮގްރާމުގައި ބައިވެރިވާ ކޮންމެ ސްކޫލެއްގައި ނޫސްވެރިންގެ ޓީމެއް އުފައްދާފައިވާނެއެވެ. މި ޓީމުގައި އެޑިޓަރާއި އަދި އެސިސްޓެންޓް އެޑިޓަރާއެކު ޖާނަލިސްޓުންނާއި ފޮޓޯ ޖާނަލިސްޓުން ހަރަކާތްތެރިވާނެއެވެ.
އޭއޯގެ ފަރާތުން ކުރިއަށްގެންދާ ސްކޫލް މީޑިއާ ޕްރޮގްރާމެއްގައި އެންމެ ރަނގަޅަށް މަސައްކަތް ކުރާ ސްކޫލެއް ހޮވައި އެސްކޫލަކަށް “ސްކޫލް މީޑިއާ އެވޯޑް” ގެ ނަމުގައި އެވޯޑެއް ދޭ ގޮތަށް ވަނީ ހަމަޖެހިފައެވެ. އެގޮތުން 2017 ވަނަ އަހަރު މި ޕްރޮގްރާމުގައި ބައިވެރިވި ސްކޫލްތަކުގެ ތެރެއިން އެންމެ ރަނގަޅަށް މަސައްކަތް ކުރި މީޑިއާ އަކަށް މިއަހަރު އޭއޯގެ އަހަރީ ދުވަސް ފާހަގަކުރާ ހަފްލާގައި އެވޯޑު ދޭނެއެވެ،
އޭއޯ ނިއުސް އިން ކުރިއަށް ގެންދާ ސްކޫލް މީޑިއާ ޕްރޮގްރާމުގައި މިހާތަނަށް އައްޑޫގެ 7 ސްކޫލަކުން ވަނީ ބައިވެރިވެފައެވެ. އެއީ ސ.އަތޮޅު މަދުރަސާ، ޝަމްސުއްދީން ސްކޫލް، ހުޅުދޫ ސްކޫލް އަދި ފޭދޫ ސްކޫލާއި އިރުޝާދިއްޔާ ސްކޫލާއި ހިތަދޫ ސްކޫލުގެ އިތުރުން މިއަދު ޕްރޮގްރާމުގައި ބައިވެރިވި ޝަރަފުއްދީން ސްކޫލެވެ. މި ޕްރޮގްރާމުގެ ދަށުން ސްކޫލުތަކުގެ ދަރިވަރުންނަށް އެދަރިވަރުން ކިޔަވާ ސްކޫލެއްގައި ކުރިއަށް ގެންދާ ޕްރޮގްރާމުތައް އާންމުންނާއި ހަމައަށް ފޯރުކޮށްދީ ސްކޫލު ޕްރޮމޯޓު ކުރުމަށް މަސައްކަތް ކުރުމުގެ ފުރުސަތު ފަހިކޮށްދޭނެއެވެ.
