އިނގިރޭސި ޕްރިމިއާ ލީގުގައި ރޭ ސައުތުހެމްޓަން އާއި އެންމެ ފަހުގެ ލީގު ޗެމްޕިއަން ޗެލްސީން ކުޅުނު މެޗުގައި އޮލީވިއާ ޖިރޫޑް ކާމިޔާބު ކޮށްދިން ދެ ލަނޑުން ފަހަތުން އަރައި ޗެލްސީއިން މުހިންމު މޮޅެއް ހޯދައިފިއެވެ.
ސައުތުހެމްޓަންގެ ދަނޑުގައި ކުޅުނު މިމެޗުން 3-2 ލަނޑުގެ ނަތީޖާއަކުން ޗެލްސީ މޮޅުވުމުން ޗެލްސީއަށް ވަނީ އެ ޓީމް ގަދަ ހަތަރު ޓީމްގެ ތެރޭގައި ހިމެނުމަށް ކުރަމުން އަންނަ މަސައްކަތަށް އިތުރު ހިއްވަރެއް ލިބިފައެވެ. ރޭގެ މެޗުގައި ޗެލްސީއިން މޮޅުވީ ސައުތުހެމްޓަންއިން ދެ ގޯލް ޖަހައި ލީޑު ނަގައިފައިވަނިކޮށް ފަހަތުންއަރައި ތިން ގޯލް ޖަހައިގެންނެވެ.
ރޭ އަމިއްލަ ދަނޑުގައި ކުޅުނު މިމެޗުގެ ފުރަތަމަ ހާފްގައި ސައުތުހަމްޓަން އިން މޮޅު ކުޅުމެއް ދައްކާފައިވާ އިރު އެ ޓީމުން ވަނީ މެޗުގެ 21 ވަނަމިނެޓްގައި ޖެހި ޑޫސާން ޓަޑިޗެގެ ލަނޑުން މެޗުގެ ލީޑު ނަގާފައެވެ.
މި ގޯލައަށް ފަހު ސައުތުހޭމްޓަން އިން މުޅި މެޗު ކޮންޓުރޯލް ކޮށް ގިނަ ހަމަލާތަކެއް ވަނީ ފުރަތަމަ ހާފްގައި ފޮނުވާލާފައެވެ. އެހެން ނަމަވެސް ފުރަތަމަ ހާފް ނިމިގެން ދިޔައީ 1-0 ލަނޑުން ސައުތަހަމްޓަން ކުރީގައި އޮވެގެންނެވެ.
ރޭގެ މެޗުގައި އެންމެ ފަހުގެ ޗެމްޕިއަން ޗެލްސީ އިތުރަށް މާޔޫސް ވެގެންދިޔައީ މެޗުގެ 60 ވަނަ މިނެޓުގައި ސައުތުހެމްޓަންގެ ޖޭން ބެޑްނެރެކް ޖެހި ލަނޑާއި އެކު މެޗުގެ ފަރަގު 2-0 ލަނޑައަށް ބަދަލު ވެގެން ދިއުމުންނެވެ. އެހެން ނަމަވެސް ދެވަނަ ހާފްގައި މޮރާޓާގެ ބަދަލުގައި ކުޅެން ނިކުތްތާ 10 މިނެޓުވެސް ނުވަނީސް ޖިރޫޑް ވަނީ އޭނާގެ ފުރަތަމަ ގޯލް ޖަހައި ޗެލްސީއަށް އުންމީދު އާކޮށްދިނެވެ. އަދި މެޗުގެ 75 ވަނަ މިނެޓުގައި އެޑިން ހަޒާޑްގެ ގޯލުން ޗެލްސީ ނަތީޖާ ހަމަހަމަ ކުރި އިރު 78 ވަނަ މިނެޓުގައި ޖިރޫ ވަނީ އޭނާގެ ދެވަނަ ލަނޑުން ޗެލްސީއަށް ތިން ޕޮއިންޓް ކަށަވަރު ކޮށްދީފައެވެ.
ރޭގެ މެޗުން ލިބުނު މޮޅާއި އެކު ޗެލްސީ އޮތީ 33 މެޗުން 60 ޕޮއިންޓާއެކު ފަސް ވަނައިގައެވެ.އަދި ހަތަރު ވަނައިގައި އޮތް ޓޮޓެންހަމް އޮތީ 32 މެޗުން 67 ޕޮއިންޓާއެކުގައެވެ.
މިރޭގެ މެޗުން ބަލިވި ސައުތުހޭމްޓަން އޮތީ ރެލިގޭޝަން ޒޯންގައެވެ. އެޓީމަށް ލިބެނީ 33 މެޗުން 28 ޕޮއިންޓެއެވެ.
