ސްޕެނިޝް ލަލީގާގައި ރޭ މެޑްރިޑްގެ ދެ ކުލަބް ކަމުގައިވާ ރިއާލް މެޑްރިޑާއި އެތުލެޓިކޯ މެޑްރިޑު ބައްދަލު ކުރި މެޗު އެއްވަރުވެ އެންމެ ފަހުގެ ލީގު ޗެމްޕިއަން ރިއާލްމެޑްރިޑް ހަތަރު ވަނަ މަގާމަށް ވެއްޓިޖެއެވެ.
ލީގުގައި ރޭ މި ދެ ޓީމް ރިއާލްގެ ދަނޑުގައި ބައްދަލު ކުރި މެޗު އެއްވަރުވީ 1-1 ގެ ނަތީޖާއަކުންނެވެ.
ރިއާލްގެ އަމިއްލަ ދަނޑުގައި ކުޅުނު މި މެޗުގެ ފުރަތަމަ ހާފުގައި ދެޓީމުން ކުރެ ޓީމަކަށް ލަނޑެއް ޖެހިފައިނުވާއިރު ރިއަލްމެޑްރިޑްއިން ވަނީ ދެވަނަ ހާފްގެ ހާފުގެ 53 ވަނަ މިނެޓުގައި ކްރިސްޓިއާނޯ ރޮނާލްޑޯގެ ލަނޑުން މެޗުގެ ލީޑު ނަގާފައެވެ.
އަމިއްލަ ދަނޑުގައި ރިއަލްއިން ލީޑު ނެގިތާ ހަތަރު މިނެޓް ނުވަނީސް އެތުލެޓިކޯ މެޑްރިޑުގެ އެންޓޮއިން ގްރީޒްމަން ވަނީ ލަނޑެއް ޖަހާ ޓީމަށް ނަތީޖާ ހަމަހަމަކޮށްދީފައެވެ.
ރޭގެ މި ނަތީޖާ އާއި އެކު އެތުލެޓިކޯ ތާވަލުގެ ދެވަނާގައި 68 ޕޮއިންޓާއެކު އޮތް އިރު ތާވަލްގެ ތިންވަނާގައި 65 ޕޮއިންޓާއި އެކު އޮތީ ވެލެންސިޔާއެވެ. އަދި ރޭގެ މެޗުން ބަލިވި ރިއަލްމެޑްރިޑް އޮތީ 64 ޕޮއިންޓާއެކު ތާވަލުގެ ހަތަރު ވަނާގައެވެ.
