އުރީދޫ ނޭޝަންގެ 2026 ވަނަ އަހަރުގެ މުބާރާތްތައް ފެށުމުގެ ގޮތުން، “އޯޕަން ސީރީޒް ސީޒަން 1” ގައި ބައިވެރިވުމުގެ ފުރުސަތު ހުޅުވާލައިފިއެވެ. ކޮންމެ މުބާރާތަކަށް 5،000 ރުފިޔާގެ އިނާމު ޕޫލެއް ކަނޑައަޅާފައިވާ މި ސީރީޒްގައި ހިމެނެނީ ގޭމަރުންގެ މެދުގައި މަގުބޫލު “ކްލޭޝް ރޯޔާލް” އަދި “އީއޭއެފްސީ އަލްޓިމޭޓް ޓީމް” އެވެ.
މި މުބާރާތްތަކުގެ ތެރެއިން ކްލޭޝް ރޯޔަލް މުބާރާތުގައި ބައިވެރިވުމުގެ ސުންގަޑިއަކީ އަންނަ ފެބްރުއަރީ މަހުގެ 3 ވަނަ ދުވަހުގެ ނިޔަލަށެވެ. އަދި މުބާރާތުގެ ކުޅުން ފެށުމަށް ހަމަޖެހިފައިވަނީ ފެބްރުއަރީ 6 ވަނަ ދުވަހުއެވެ. އީއޭއެފްސީ މުބާރާތަށް ރަޖިސްޓްރީވުމުގެ ފުރުސަތު ފެބްރުއަރީ 12 ގެ ނިޔަލަށް އޮންނައިރު، މި މުބާރާތް ފަށާނީ ފެބްރުއަރީ 16 ގައެވެ. މިއިން ކޮންމެ މުބާރާތެއްގެ ރަޖިސްޓްރޭޝަން ފީއަކީ 50 ރުފިޔާއެވެ.
އުރީދޫ ނޭޝަން އިން ބުނީ މި މުބާރާތްތައް ކުރިއަށް ގެންދިއުމަށް ރާވާފައިވަނީ އޮންލައިން ފޯމެޓަށް ކަމަށެވެ. މީގެ މައިގަނޑު ބޭނުމަކީ ރާއްޖޭގެ ކޮންމެ ރަށެއްގައި ހުރި ނަމަވެސް، ހަމަހަމަ ފުރުސަތެއްގެ ދަށުން ކުޅުންތެރިންނަށް ބައިވެރިވެވޭނެ ގޮތް ހެދުން ކަމަށް އެ ފަރާތުން މައުލޫމާތު ދެއެވެ. މިއީ މުޅި ރާއްޖޭގެ ގޭމިން ކޮމިއުނިޓީ އެއް ޕްލެޓްފޯމަކުން ގުޅުވާލައި، ކުޅުންތެރިންގެ ހުނަރު ދައްކާލުމަށް ލިބޭ ރަނގަޅު ފުރުސަތެކެވެ.
އީ-ސްޕޯޓްސް މެދުވެރިކޮށް ޑިޖިޓަލް ދުނިޔޭގައި ޒުވާނުންނަށް ކުރިއަށް ދިއުމުގެ މަގު ފަހިކޮށްދިނުމަކީ އުރީދޫގެ މުހިންމު އަމާޒެކެވެ. އެހެންކަމުން 2026 ވަނަ އަހަރުގެ މި ފުރަތަމަ މުބާރާތްތަކުގައި ބައިވެރިވުމަށް ރާއްޖޭގެ ހުރިހާ ގޭމަރުންނަށް އުރީދޫ ނޭޝަން އިން ވަނީ ދައުވަތު އަރުވާފައެވެ. ރަޖިސްޓްރީވުމަށް އުރީދޫ ނޭޝަންގެ ވެބްސައިޓް ބޭނުންކުރެވޭނެއެވެ.
