ލޮލުގެ ފެނުމުން މަހުރޫމްވެފައިވާ މީހުންގެ ދިރިއުޅުމުގައި ބްރެއިލް ނިޒާމު އަދާކުރާ މުހިންމު ދައުރަށް އަލިއަޅުވާލައްވައި، މެޑަމް ސާޖިދާ ވަނީ އެ ފަރާތްތަކުގެ ކިބައިގައި ހުންނަ ހިތްވަރާއި ކެތްތެރިކަން ފާހަގަކުރައްވާފައެވެ. މީގެ އިތުރުން މުޖުތަމައުގެ އެންމެހައި ފަރުދުންގެ މެދުގައި އޯގާތެރިކަން އިސްކޮށް، ކޮންމެ ފަރުދަކީ ވެސް ބާރުވެރި އަދި އަގުވަޒަން ކުރެވޭ މީހެއްކަމުގެ އިހުސާސް ކޮށްދިނުމަށް މަސައްކަތް ކުރުމަށް އެކަމަނާ ބާރުއެޅުއްވިއެވެ.
މި ދުވަހާ ގުޅިގެން ރައީސް ޑރ. މުހައްމަދު މުއިއްޒު ވެސް ވަނީ މެސެޖެއް ދެއްވާފައެވެ. ރައީސް ދެއްވި މެސެޖުގައި ވިދާޅުވީ ސަރުކާރުގެ ސިޔާސަތުތައް ބައްޓަން ކުރައްވާނީ އެއްވެސް މީހަކު ބާކީ ނުވާނެ ގޮތަށް ކަމަށެވެ. އަދި އެންމެން ޝާމިލުވާ ގޮތަށް، ހުރިހާ ފަރުދުންނަށް ހުރަހެއް ނެތި މައުލޫމާތާއި ފުރުސަތުތައް ފަހިވެފައިވާ މުޖުތަމައެއް ބިނާކުރުމަށް ސަރުކާރުން މަސައްކަތް ކުރައްވާނެ ކަމުގެ ޔަގީންކަން އެމަނިކުފާނު ދެއްވިއެވެ.
