މަސްތުވާތަކެތި ވިއްކައި މަނީ ލޯންޑާކުރުމުގައި އިސްކޮށް އުޅޭ ކަމުގެ ތުހުމަތުގައި ފުވައްމުލަކުން އަތުލައިގަތް މީހުން ހައި ކޯޓުން ދޫކޮށްލުމުން އަލުން އަމުރެއް ނެރެ ހައްޔަރުކޮށްފި އެވެ.
ޏ. ފުވައްމުލަކުގައި ފުޅާ ދާއިރާއެއްގައި ޑުރަގު ވިއްކައި، މަނީލޯންޑާކުރި ކަމުގެ ތުހުމަތުގައި މިދިޔަ ޑިސެންބަރު މަހު ހައްޔަރު ކޮށްފައި ތިބީ، ޏ. ފުވައްމުލަކު ދޫޑިގަން، ކަރަންކާވިލާ އުމުރުން 34 އަހަރުގެ އަޙުމަދު ނިއުޝާދާއި ޏ. ފުވައްމުލަކު ދޫޑިގަން، ޒަމާނީގެ އުމުރުން 29 އަހަރުގެ ޙަސަން ޢާޒިމެވެ.
އެ ދެމީހުންގެ މައްޗަށް ކުރަނީ މަސްތުވާތަކެއްޗާއި މަނީ ލޯންޑަރިންގެ ދައުވާއެވެ.
އެ މީހުންނާ އެކު އިތުރު ބަޔަކު ހައްޔަރުކުރި ނަމަވެސް މި ދެ މީހުންގެ މައްޗަށް ފުލުހުން ކުރަނީ އެކަމުގައި އިސްކޮށް ހަރަކާތްތެރިވާ ކަމުގެ ތުހުމަތެވެ. އެ މައްސަލައާ ގުޅިގެން ފުވައްމުލަކު މެޖިސްޓްރޭޓުން އެ މީހުން ޝަރީއަތް ނިމެންދެން ބަންދުކުރި އެވެ. ނަމަވެސް، އެ އަމުރު ހައި ކޯޓުގައި އިސްތިއުނާފު ކުރުމުން އެ ކޯޓުން ކުރި ހުކުމްގައި ބުނީ ތުހުމަތު ކުރެވޭ ކޮންމެވެސް މިންވަރެއްގެ ހެކި ހުރި ކަމަށް ބަޔާން ކުރުމަށް ފަހު، އެ ދެ މީހުން ޝަރީއަތް ނިމެންދެން ބަންދުކުރަން ނިންމުމަކީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާއާ ހިލާފު ނިންމުމެއް ކަމަށެވެ. އެހެންވެ، އެ ދެ މީހުން ވެސް ބަންދުން ދޫކޮށްލި އެވެ.
ކްރިމިނަލް ކޯޓު އަމުރުގައި ބުނެފައިވާ ގޮތުގައި އެ މައްސަލައާ ގުޅިގެން އެ ދެމީހުން ޝަރީއަތް ނިމެންދެން ބަންދުގައި ބަހައްޓަން ޏ. ފުވައްމުލަކު ކޯޓުން ނެރުނު އަމުރު ރާއްޖޭގެ ހައިކޯޓުން ބާތިލުކުރި ނަމަވެސް، އައު އަމުރެއްގެ ދަށުން އެ ދެމީހުން އަލުން ހައްޔަރުކޮށް ބަންދުކުރުމަށް ހުރަހެއް އޮތްކަމަށް ނުފެންނަ ކަމަށެވެ.
އެ މީހުން ތިބީ މާލޭގައި ކަމަށް ވާތީ މެޖިސްޓްރޭޓް ކޯޓުގެ އަމުރު ތަންފީޒުކޮށްފައިވަނީ މާލޭގަ އެވެ. އަދި ބަންދާ މެދު ގޮތެއް ކަނޑައަޅަން ކޯޓަށް ގެންދިޔުމުން އާޒިމްގެ ބަންދަށް ހަތް ދުވަސް އަދި ނިއުޝާދުގެ ބަންދަށް 10 ދުވަސް ކްރިމިނަލް ކޯޓުން ވަނީ ދީފަ އެވެ.
ކޯޓު އަމުރުގައިވާ ގޮތުން އާޒިމްގެ އެކައުންޓުން ފަސް މިލިއަން ރުފިޔާ ރޯލްކޮށްފައިވެ އެވެ. އޭނާއަކީ ދާއިމީކޮށް ވަޒީފާއެއްގައި އުޅުނު މީހެއްކަން އެނގެން ނެތް ކަމަށާއި މުސާރައިގެ ގޮތުގައި ލިބުނު އަދަދުތަކާ ނުބައްދަލު އަދަދުތަކުން އެކައުންޓަށް ޖަމާވެ، އެހެން މީހުންނަށް ފައިސާ ފޯރުކޮށްދީފައިވާ ކަމަށް ފުލުހުން ބުނާ ކަމަށް ވެސް އަމުރުގައިވެ އެވެ.
ނިއުޝާދުގެ އެކައުންޓުން ފަސް އަހަރުގެ ތެރޭގައި 21 މިލިއަން ރުފިޔާ ރޯލްކޮށްފައިވާ ކަމަށާއި އޭނާއަކީ ވެސް ދާއިމަށް ވަޒީފާގައި އުޅުނު މީހެއްކަން އެނގެން ނެތް ކަމަށް ފުލުހުން ބުނާ ކަމަށް ވެސް އަމުރުގައިވެ އެވެ.
