މޯލްޑިވްސް އެސޯސިއޭޝަން އޮފް ހިއުމަން ރިސޯސް ޕްރޮފެޝަނަލްސް (މާޕް) ގެ 5 ވަނަ ނޭޝަނަލް އެޗް.އާރް ކޮންވެންޝަން އަދި އެކްސްޕޯ 2025 ފެބްރުވަރީ 08 ވާ ހޮނިހިރު ދުވަހާއި 09 ވާ އާދީއްތަ ދުވަހު ބޭއްވުމަށް ހަމަޖައްސައި އިވެންޓަށް ރަޖިސްޓްރީ ވުމަށް ހުޅުވާލައިފިއެވެ.
ރާއްޖޭގައި ގިނަ ބައެއްގެ ތަރުހީބު ލިބިގެން ބޮޑު އޯޑިއަންސަކާއެކު ކުރިއަށް ގެންދާ މި ކޮންވެންޝަންގެ މި އަހަރުގެ ތީމަކީ “އައު ގޮތްތައް ހޯދައި، ހާލަތަށް ބަދަލުވެ، ކުރިއަށް ދިއުން: ބަދަލުވަމުންދާ ދުނިޔެއަކަށް ޤާބިލުކަން ބިނާކުރުން” އެވެ.
މި ތީމުން ފާހަގަކޮށްދެނީ މިއަދުގެ އަވަސް ބާރުމިނުގައި ބަދަލުވަމުންދާ ދުނިޔޭގެ މާޙައުލުގައި ހަލުވިކަމާއި، އައު ގޮތްތައް ހޯދުމާއި، މުސްތަޤްބަލަށް ތައްޔާރުވެފައިވާ ލީޑަރޝިޕްގެ މުހިންމުކަމެވެ. ސަބް-ތީމްތަކާއި މަޝްވަރާކުރެވޭނެ ދާއިރާތަކުގެ ތެރޭގައި ހިމެނެނީ ހަލުވިކަމާއި އައު ގޮތްތައް ހޯދުން، އިންސާނީ ޤާބިލުކަމާއި ލީޑަރޝިޕް ތަރައްޤީކުރުން، އާޓިފިޝަލް އިންޓެލިޖެންސް މެދުވެރިކޮށް އެޗްއާރް އިންޤިލާބީ ބަދަލަކަށް ގެނައުން، އަދި ދުޅަހެޔޮކަމާއި ހެޔޮ ދިރިއުޅުމެއް މެދުވެރިކޮށް މަސައްކަތުގެ ބާރުތައް އަލުން އެކުލަވާލުން ފަދަ މައުޟޫޢުތަކެވެ.
މި އަހަރުގެ އިވެންޓުގައި 350 އަށްވުރެ ގިނަ ބައިވެރިން ބައިވެރިވާނެކަމަށް ލަފާކުރެވޭއިރު، ބައިނަލްއަޤްވާމީ 8 ކީނޯޓް ސްޕީކަރުންނާއި، ރާއްޖެއާއި ރާއްޖެއިން ބޭރުގެ ދާއިރާއާ ގުޅުންހުރި 16 މާހިރުންގެ ހުށަހެޅުއްވުން ހިމެނިގެން ދާނެކަމަށް އެ އެސޯސިއޭޝަނުން ބުނެއެވެ. މީގެ އިތުރުން މި އަހަރު އަލަށް ތަޢާރަފުކުރާ 4 މާސްޓަރ ކްލާސްތަކެއްވެސް ހިމެނޭއިރު، މިއީ މިހާތަނަށް މާޕްގެ ފަރާތުން ބޭއްވޭ އެންމެ ބޮޑު އަދި އެންމެ ފުރިހަމަ ކޮންވެންޝަންކަމުގައި ވެގެން ދާނެ ކަމަށް ވެސް މާޕްއިން ބުނެއެވެ.
2019 ވަނަ އަހަރު ފެށުނީއްސުރެ، މާޕްގެ އެޗް.އާރް ކޮންވެންޝަން ވެފައި ވަނީ ދިވެހިރާއްޖޭގައި އެޗް.އާރް ޕްރޮފެޝަނަލުންނާއި ދާއިރާއާ ގުޅުންހުރި ލީޑަރުންގެ/ އިސްވެރިންގެ އެންމެ ބޮޑު އެއްވުމަށެވެ. އަދި މިހާތަނަށް މާޕްގެ ފަރާތުން ބާއްވާފައިވާ ހަތަރު އިވެންޓުގައި 1،650 އަށްވުރެ ގިނަ ބައިވެރިން ވަނީ ބައިވެރިވެފައިވެއެވެ.
އިވެންޓުގައި ކީނޯޓު ސްޕީކަރުންގެ ގޮތުގައި ހަމަޖެހިފައިވާ ފަރާތްތައް:
މީގެ އިތުރުން، މުޙައްމަދު ޝަރީފް ފަދަ ރާއްޖޭގެ ތަޖުރިބާކާރު މާހިރުން ގެ ބައިވެރިވެލެއްވުންވެސް ފެނިގެންދާނެކަމަށް މާޕްއިން ބުނެއެވެ.
“އަޅުގަނޑުމެންގެ ސިގްނޭޗަރ އިވެންޓް އަނބުރާ ގެނެސް، ޤައުމުގެ އެކި ކަންކޮޅުތަކުގައި ދާއިރާގެ ފަރާތްތަކަށް ހިތްވަރުދީ ބާރުވެރިކުރުވުމަށް އަޅުގަނޑުމެން ވަރަށް އުފާކުރަމެވެ. އަބަދުވެސް ބަދަލުވަމުން މިދާ ދުނިޔޭގައި، އެއްބާރުލުން ދިނުމަކީ ވަރަށް މުހިންމު ކަމެކެވެ. އަދި މާޕްގެ އެޗް.އާރް ކޮންވެންޝަނަކީ މި މުހިންމު މަޝްވަރާތަކާއި ތަފާތު ހިޔާލުތަކަށް އެންމެ އެކަށީގެންވާ މަންސައެވެ” ކުރިއަށް އޮތް އިވެންޓާ ބެހޭގޮތުން މާޕްގެ ރައީސް އަޙްމަދު އިބްރާހީމް ވިދާޅުވިއެވެ.
އިވެންޓުގައި ބައިވެރިވެލައްވަން ބޭނުންފުޅުވާ ފަރާތްތަކުން ޖާގަ ކަށަވަރުކުރުމަށް، ރަޖިސްޓަރީ ކުރަން ޖެހޭނީ Event Registration މި ލިންކުންނެވެ.
ޖަމްޢިއްޔާތަކާއި ގްރޫޕްތަކަށް ގްރޫޕް ރަޖިސްޓްރޭޝަނަށް ނުވަތަ އިތުރު މަޢުލޫމާތު ހޯދުމަށް [email protected] ނުވަތަ [email protected] މެދުވެރިކޮށް މާޕްއާ ގުޅުއްވައިގެން ކުރިއަށްގެންދެވުން އެދޭކަމަށް އެ އެސޯސިއޭޝަނުން ވަނީ ބުނެފައެވެ.
2018 ވަނަ އަހަރު އުފެދުނު މާޕް އަކީ ދިވެހިރާއްޖޭގައި އިންސާނީ ވަސީލަތްތައް ތަރައްޤީކޮށް، އެ ދާއިރާގައި ފާހަގަކޮށްލެވޭ ކުރިއެރުންތަކެއް ހޯދުމަށް މަސައްކަތްކުރާ ޖަމްޢިއްޔާއެކެވެ. މި ޖަމްޢިއްޔާއިން އެސް.އެޗް.އާރް.އައި ފަދަ ސަރަޙައްދީ އަދި ދުނިޔޭގެ ފެންވަރުގެ ޖަމްޢިއްޔާތަކާ ގުޅިގެން، ރާއްޖޭގެ ބޭނުންތަކަށް އަމާޒުކޮށްގެން އެންމެ ޒަމާނީ މަޢުލޫމާތާއި ޚިޔާލުތައް ފޯރުކޮށްދެއެވެ.
އަހަރީ އެޗް.އާރް ކޮންވެންޝަންގެ އިތުރުން، މާޕްއިން ގިނަ އަދަދެއްގެ މުހިންމު ހަރަކާތްތަކެއް ވަނީ ހިންގާފައެވެ. މީގެ ތެރޭގައި ފާއިތުވި އަހަރު ބޭއްވުނު 4 ވަނަ އެޗް.އާރް ކޮންވެންޝަނާއި، 5 ވަނަ ލަރނިންގ އެންޑް ޑިވެލޮޕްމަންޓް (އެލް އެންޑް ޑީ) ކޮންފަރެންސް ހިމެނެއެވެ. މި ހަރަކާތްތަކުގައި ދުނިޔޭގެ އެންމެ ފާހަގަކޮށްލެވޭ ވާހަކަދައްކާ ފަރާތްތަކާއި، ލިޔުންތެރިންނާއި، ލަފާދޭ ފަރާތްތައް ބައިވެރިވެފައިވެއެވެ. މި ހަރަކާތްތަކުން ދިވެހިރާއްޖޭގެ އެޗް.އާރް ދާއިރާއަށް ބަދަލުތަކެއް ގެނެސް، ލީޑަރޝިޕާއި ހުނަރުވެރި މީހުން ތަރައްޤީކުރުމުގެ ދާއިރާގައި އައު ގޮތްތަކާއި ފާހަގަކޮށްލެވޭ ކުރިއެރުންތަކެއް ހޯދުމަށް މަގުފަހިކޮށްދެއެވެ.
