ހަގީގީ ކުރިއެރުމަކީ އިމާރާތްތައް ބިނާކުރުމާއެކު މުޖުމައެއްގައި ހުރި މައްސަލަތައް ހައްލުވެ، ފިކުރީ ތަރައްގީ ލިބި، ބިނާކުރަނިވި ފުދުންތެރި މުޖުތަމައެއް ބިނާވުން ކަމަށާއި، އެފަދަ ވަށާޖެހެނިވި ތަރައްގީއެއް ގެނެސްދެއްވުމަކީ ހުދު އެ މަނިކުފާނާއި ރައްޔިތުންވެސް އެދިވަޑައިގަންނަވާ ގޮތް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އއ. ރަސްދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ ސިޔާސީ އޮއިވަރުގައި ނުޖެހި، ގައުމީ ވިސްނުމެއްގައި، އަމިއްލަ ސިކުނޑިން ވިސްނައި، އެންމެން އެކަތިގަނޑެއްގެ ގޮތުގައި ކުރިއަށް ދާނަމަ، ބިނާކުރަނިވި، ދެމެހެއްޓެނިވި، ހަގީގީ ތަރައްގީ ލިބިގެންދާނެކަމަށެވެ.
ރަސްދޫގެ ރައްޔިތުން އެދިތިބި އުމްރާނީ ތަރައްގީގެ މަޝްރޫއުތަކާ ގުޅޭގޮތުން ވަހަކަފުޅުދައްކަމުން ރައީސް ވިދާޅުވީ ކުރިއަށް އޮތް 2025 ވަނަ އަހަރަށް، ރައްޔިތުންގެ މަޖިލީހުން ފާސްކުރައްވާފައި އޮތް ބަޖެޓަކީ އއ. ރަސްދޫ ހިމެނޭހެން ރާއްޖޭގެ އެކި ކަންކޮޅުތަކުގައި ތަރައްގީގެ މަޝްރޫއުތައް ހިންގޭނެ ފަދަ ގޮތަކަށް ފާސްކުރައްވާފައިވާ ބަޖެޓެއް ކަމުގައެވެ. މިހިނގާ 2024 ވަނަ އަހަރަށް ލިބިވަޑައިގެންނެވި ބަޖެޓަކީ އިންތިގީލީ މަރުހަލާގައި ހިއްސާކުރެއްވި ކަންކަމަށް ރިއާޔަތްކުރެއްވުމަކާ ނުލައި، ކުރީގެ ސަރުކާރުގެ މާލީ ވުޒާރާއިން އެކުލަވާލެއްވެވި ބަޖެޓެއް ކަމުގައިވާތީ، ތަރައްޤީގައި އޮތީ ތަޅެއް އެޅުވިފައި ކަމުގައި ރައީސް ވިދާޅުވިއެވެ.
ކުރިއަށް އޮތް 2025 އަދި 2026 ވަނަ އަހަރަށް ރާއްވަވާފައި ވާނީ، ކުޑަ ރަށެއް ބޮޑު ރަށެއް ތަފާތު ކުރެއްވުމެއްނެތި، ތަރައްޤީގެ އެކި ދާއިރާތަކުން ހިންގެވުމަށް ވައުދުވެވަޑައިގެންފައިވާ މަޝްރުއުތައް އަމަލީ ގޮތުން ފައްޓަވައި، ނިންމެވުމަށް މަސައްކަތްތައް ހިންގެވުން ކަމުގައި ރައީސް ވިދާޅުވިއެވެ. މި މޭރުމުން، އއ. ރަސްދޫއަށް އެންމެ މުހިންމު އެއް ކަމަކީ ބަނދަރު ތަރައްގީ ކުރުން ކަމަށް ވާއިރު، ރައްޔިތުން އެދިވަޑައިގަންނަވާ ފުރިހަމަ މިނުގައި އެ މަސައްކަތްކޮށްދެއްވާނެ ކަމުގެ ޔަގީންކަން، ރައީސް ވަނީ ރަސްދޫގެ ރައްޔިތުންނަށް ދެއްވާފައެވެ.
މަސްވެރިކަމަކީވެސް ރަސްދޫއަށް މުހިންމު ދާއިރާއަކަށް ވާއިރު، ސަރުކާރުން ހުރިހާ ކަމެއްގެ ކޮންޓްރޯލް ނެންގެވުމުގެ ބަދަލުގައި މަސްވެރިންނަށް ކަންކަން ދޫކުރެއްވުމުގެ އުސޫލުގެ ތެރެއިން، އަމިއްލަ އޮޑިފަހަރުގައި އައިސް އުފައްދާ، މަހުގެ ތާޒާކަން ކަށަވަރު ކުރުމުގެ ފުރުޞަތު، އއ. ރަސްދޫ ރައްޔިތުންނަށްވެސް އެބަ އޮތް ކަމަށާއި، އެ ކަމަށް ބޭނުންވާ އެހީގެ މަގުތައް ފަހިކޮށްދެއްވުމުގައި، ކައުންސިލްތަކާއި ގުޅިވަޑައިގެން އެ މަނިކުފާނުގެ ސަރުކާރުން ހަރަކާތްތެރިވެވަޑައިގަންނަވާ ކަމަށްވެސް ރައީސް ވަނީ ވިދާޅުވެފައެވެ. އަދި އއ. ރަސްދޫއަކީ ފަތުރުވެރިކަމުގެ ސިނާޢަތްވެސް ފުޅާވެފައި އޮތް ރަށަކަށް ވާއިރު، ވެއްޓާ ރައްޓެހި ދެމެހެއްޓެނިވި ރޫޙެއްގައި ފަތުރުވެރިކަން ކުރިއެރުވުމަށްވެސް ރައީސުލްޖުމްހޫރިއްޔާ ވަނީ ގޮވާލައްވާފައެވެ. އެގޮތުން އއ. ރަސްދޫގައި ހިންގާ ގެސްޓްހައުސްތަކަކީ އިރުގެ އަވިން ހަކަތަ އުފައްދާ ނިޒާމުތަކަށް ބަރޯސާވާ ތަންތަން ކަމުގައި ހަދައި، އިޔާދަކުރަނިވި ހަކަތައަށް ބަދަލުވުމަށް ރައީސް ވަނީ ހިތްވަރު ދެއްވާފައެވެ.
އެދިވަޑައިގެންނެވި ގޮތަށް ކަންކަން ނުކުރެވި މިދިޔަ އަހަރު ފާއިތުވީ ބަޖެޓުގެ ސަބަބުންކަން ފާހަގަކުރައްވަމުން ރައީސް ވިދާޅުވީ، މިދިޔަ އަހަރު ކުރައްވަން ޖެހިވަޑައިގެންނެވި އެންމެ ބޮޑު ކަމަކީ ބަނގުރޫޓު ނުވެ، ސަލާމަތުގެ އައްސޭރިއަށް އިގްތިސާދު ގެންދެވުން ކަމަށެވެ. އަދި ޤާއިމުކުރެއްވުނު މި ބިންގަލުގެ މަތީގައި ދިވެހިރާއްޖޭގެ އިޤްތިޞާދު ދާނީ ކުރިއަށްކަން ފާހަގަކުރައްވަމުން، ރައީސުލްޖުމްހޫރިއްޔާ ވަނީ އއ. ރަސްދޫއަކީ މަސްވެރިކަމާއި ފަތުރުވެރިކަމުގެ ސިނާއަތް އޮތް ރަށެއްކަން ފާހަގަކުރައްވާފައެވެ. އެގޮތުން ރަށުގެ ތަރައްގީއަށް ކުރަންޖެހިފައިވާ މަސައްކަތްތަކަކީ، އެމަނިކުފާނު ވެވަޑައިގެންފައިވާ ވަޢުދުތަކަށް އިސްކަންދެއްވައިގެން، 2025 ވަނަ އަހަރުގެ ތެރޭގައި ކުރައްވާނެ މަސައްކަތްތަކެއްކަމުގައިވެސް ރައީސް ވިދާޅުވިއެވެ.
