ބީއެމްއެލްގެ ޑެޕިއުޓީ ސީއީއޯ އަދި ޗީފް އޮޕަރޭޝަންސް އޮފިސަރު (ސީއޯއޯ)ގެ މަގާމަށް ސަހާ ވަހީދު އައްޔަން ކޮށްފިއެވެ.
ބޭންކް އޮފް މޯލްޑިވްސްއިން އެ ބޭންކުގެ ލީޑާޝިޕް އޮނިގަނޑަށް މުހިންމު ބަދަލުތަކެއް ގެނެސްފައިވާއިރު ބީއެމްއެލްގެ ސީއޯއޯގެ މަގާމުގެ މަސްއޫލިއްޔަތާއެކު ބޭންކިން އޮޕަރޭޝަންސް، ލީގަލް އެންޑް ކޯޕަރޭޓް އެފެއާޒް، ހިއުމަން ރިސޯސަސް، އެޑްމިނިސްޓްރޭޝަން އެންޑް ޕްރޮޕަޓީސްގެ އިތުރުން ބޭންކުގެ ޕްރޮކިއުމަންޓް ބަލަހައްޓަވާނީ އާ ސީއޯއޯ ސަހާ ވަހީދުއެވެ.
ސަހާ ވަނީ ލަންޑަން ސްކޫލް އޮފް އިކޮނޮމިކްސް އެންޑް ޕޮލިޓިކަލް ސައިންސް އިން އިކޮނޮމިކްސް އެންޑް އިކޮނޮމިކް ހިސްޓްރީގެ ދާއިރާއިން ބެޗްލާ އޮފް ސައިންސް ޑިގްރީ ހާސިލުކުރައްވާފައެވެ. އަދި މީގެ އިތުރުން ކޮމާޝަލް ލޯގެ ދާއިރާއިން މާސްޓަރ އޮފް ލޯސް (އެލްއެލްއެމް) ހާސިލްކުރައްވާފައިވެއެވެ. ސަހާ ވަނީ އޭޝިއަން އިންސްޓިޓިއުޓް އޮފް ޗާޓަޑް ބޭންކާސްއިން ޗާޓަޑް ބޭންކާ ޕްރޮފެޝަނަލް ކޮލިފިކޭޝަންވެސް ހާސިލުކުރައްވާފައެވެ.
ބޭންކިން ދާއިރާގައި 18 އަހަރަށްވުރެ ގިނަ ދުވަހުގެ ތަޖުރިބާ ހޯއްދަވާފައިވާ ސަހާ ވަނީ ބޭންކުގައި މުހިންމު މަގާމުތަކެއް ފުރުއްވާފައެވެ. މީގެ ތެރޭގައި ހެޑް އޮފް ސްޓްރެޓެޖިކް ޕްލޭނިން އެންޑް ޗޭންޖް މެނޭޖްމަންޓްގެ އިތުރުން އެންމެ ފަހުން އަދާކުރެއްވި ޕީޕަލް އެންޑް ޗޭންޖް ޑިރެކްޓަރުގެ މަގާމު ހިމެނެއެވެ.
ބޭންކުގެ ދިގު މުއްދަތުގެ ސްޓްރެޓެޖިކް ލަނޑުދަނޑިތަކާ އެއްގޮތަށް ބޭންކުގެ ހިންގުމުގެ އޮނިގަނޑު ބައްޓަންކުރުމަށްޓަކައި، ބޭންކުން ވަނީ އައު އެގްޒެކެޓިވް މެނޭޖްމަންޓް ޓީމު އިއުލާންކޮށްފައެވެ.
ބީއެމްއެލްގެ ލީޑާޝިޕް އޮނިގަނޑަށް ގެނެވުނު ބަދަލުތައް:
1- ޗީފް ފައިނޭންޝަލް އޮފިސަރު – ނަންދަނަ ސެނެވިރަތުނެ
2- ޗީފް ރިސްކް އޮފިސަރު – ގެރީ ލޯޓަން
3- ޗީފް ޓެކްނޮލޮޖީ އޮފިސަރު (ސީޓީއޯ) – އަދުލީ އަހްމަދު ދީދީ – ބޭންކުގެ ޓެކްނޮލޮޖީ ސްޓްރެޓެޖީ އަދި ޑިޖިޓަލް ޓްރާންސްފޮމޭޝަން ބަލަހައްޓަވާނީ އަދުލީއެވެ.
4- ޗީފް ބިޒްނަސް އޮފިސަރ (ސީބީއޯ) – މޫސާ ނިމާލް – ކޯޕަރޭޓް ކަސްޓަމަރުންނާއި ވިޔަފާރިތަކާއި އަމިއްލަ ފަރުދުންގެ ބޭންކިން ހިދުމަތްތައް ބަލަހައްޓަވާނީ ނިމާލްއެވެ.
5- ޗީފް ކްރެޑިޓް އޮފިސަރ (ސީސީއޯ) – ރަޝްފާ ޖައުފަރު – ކްރެޑިޓް ރިސްކް މެނޭޖްމަންޓް، ރިކަވަރީސް އަދި ކްރެޑިޓް އެޑްމިނިސްޓްރޭޝަން ބަލަހައްޓަވާނީ ރަޝްފާއެވެ.
6- ޗީފް މާކެޓިން އޮފިސަރު (ސީއެމްއޯ) – އައިޝަތު ޒަމްރާ ޒާހިރު – މާކެޓިން، ކަސްޓަމާ ސާވިސަސް، އަދި ޕްރޮޖެކްޓް މެނޭޖްމަންޓް ބަލަހައްޓަވާނީ ޒަމްރާއެވެ.
7- ޗީފް އިސްލާމިކް ބޭންކިން އޮފިސަރު (ސީއައިބީއޯ) – ޙަސަން ކަލާމް – ބީއެމްއެލް އިސްލާމިކްގެ ދަށުން ހިދުމަތްދޭ ވިޔަފާރިތަކާއި އަމިއްލަ ފަރުދުންގެ ބޭންކިން ހިދުމަތްތައް ބަލަހައްޓަވާނީ ކަލާމްއެވެ.
މި ބަދަލާއި ގުޅޭގޮތުން ބޭންކް އޮފް މޯލްޑިވްސްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވީ މި މުހިންމު ލީޑާޝިޕް މަގާމުތަކަށް ދިވެހިން އައްޔަން ކުރެވިގެންދިޔަކަމީ ތައުލީމީ ގާބިލު ދިވެހިން ބިނާކުރުމަށް ދޭ އަހައްމިއްޔަތުކަން ކަމަށެވެ. އަދި މިއިން ކޮންމެ ބޭފުޅަކީވެސް އެބޭފުޅެއްގެ ދާއިރާގައި ނަމޫނާ ތަޖުރިބާކާރުން ކަމަށް މުހައްމަދު ޝަރީފް ވިދާޅުވިއެވެ.
އިތުރަށް މުހައްމަދު ޝަރީފް ވިދާޅުވީ އެބޭފުޅުން ސާބިތުކޮށްދެއްވާފައިވާ ގާބިލުކަމާއި ރާއްޖޭގެ ބޭންކިން ދާއިރާއާ ބެހޭ ގޮތުން ހޯއްދަވާފައިވާ ފުރިހަމަ މައުލޫމާތާއެކު މުޅި ރާއްޖޭގެ އެކި ކަންކޮޅުތަކުގައި ތިބި ފަރުދުންނާއި، ވިޔަފާރިތަކާއި މުޖުތަމައުތަކަށް އެހީތެރިވުމަށް ބީއެމްއެލްއިން ކަނޑައަޅާފައިވާ ތަސައްވުރަށް ވާސިލުވުމަށް މަގުފަހިވެގެންދާނެ ކަމަށެވެ.
