މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި އައްޑޫ ސިޓީ އާއި ޅ. ކުރެންދޫ ބައްދަލުކުރި މެޗު އެއްވަރުވެއްޖެއެވެ.
ރޭ ގައުމީ ފުޓްބޯޅަ ދަނޑުގައި ކުޅުނު ގްރޫޕް ސީގެ މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.
މި މެޗުގެ ފުރަތަމަ ހާފުގައި ދެ ޓީމުން ކުރެ ޓީމަކަށް ލަނޑެއް ކާމިޔާބުކުރެވިފައިނުވާއިރު މި މެޗުގެ 68 ވަނަ މިނެޓުގައި އައްޑޫއަށް ލަނޑު ކާމިޔާބުކޮށްދިނީ ހާޒިމް ފައުޒީއެވެ. މި މެޗުގައި ދެ ޓީމުގެ ފަރާތުންވެސް އެއްވަރުގެ މޮޅު ކުޅުމެއް ފެނިގެންގޮސްފައިވާއިރު މެޗު ނިމެން ފަސް މިނެޓަށް ވެފައި ވަނިކޮށް ކުރެންދޫން ވަނީ ނަތީޖާ އެއްވަރުކޮށްފައެވެ. ހިލޭ ޖެހުމަކުން މި ލަނޑު ކާމިޔާބުކޮށްދިނީ ބެލްޖިއަމް މިޑްފީލްޑަރު ޖޯޑީ ބާޓްއެވެ.
މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް މުބާރާތުގައި ޖުމްލަ 17 ޓީމެއް ވާދަކުރެއެވެ. ޖުމްލަ ހަތަރު ގުރޫޕަށް ބަހާލައިގެން ކުރިއަށް ގެންދާ މި މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އާއި ދ. މީދޫ އަދި ހއ. ދިއްދޫއެވެ.
