ތުރުކީވިލާތާއި ދިވެހިރާއްޖެއާ ދެމެދު ހަދާފައިވާ މިނިވަން ވިޔަފާރީގެ އެއްބަސްވުމުގެ ދަށުން، އެ ގައުމުން 60 ޕަސަންޓުގެ އިމްޕޯޓު ޑިއުޓީ ނަގަމުން ދިޔަ މަހުގެ އުފެއްދުންތަކުގެ 39 ބާވަތަކަށް ޑިއުޓީ ނުނަގާނެ ކަމަށް އިކޮނަމިކް މިނިސްޓްރީން ބުނެފިއެވެ.
ދިވެހިރާއްޖެއާއި ތުރުކީވިލާތާ ދެމެދު ވިޔަފާރީގެ ގުޅުން ބަދަހި ކުރުމަށްޓަކައި، މިނިވަން ވިޔަފާރީގެ އެއްބަސްވުމެއްގައި ސޮއިކުރެއްވެވުމަށް ފަހު އެކްސްގައި ކުރެއްވި ޕޯސްޓެއްގައި އިކޮނޮމިކް މިނިސްޓަރ ސައީދު ވިދާޅުވީ، އެ އެއްބަސްވުމުގެ ދަށުން ރާއްޖެއިން ތުރުކީއަށް އެތެރެކުރާ 100 އަށްވުރެ ގިނަ ބާވަތްތަކުން ޑިއުޓީ ކުޑަވާނެ ކަމަށެވެ. އަދި ރާއްޖޭން ތުރުކީއަށް ބޭރުކުރާ މަހުގެ ގިނަ ބާވަތްތައް ސުން ޕަސެންޓު ޑިއުޓީގައި ތުރުކީއަށް އެތެރެ ކުރެވޭނެ ކަމަށްވެސް މިނިސްޓަރު ވިދާޅުވިއެވެ.
މިއެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުހައްމަދު ސައީދެވެ. ތުރުކީގެ ފަރާތުން ސޮއިކުރެއްވީ އެޤައުމުގެ މިނިސްޓަރ އޮފް ޓްރޭޑް ޕްރޮފެސަރ ޑރ.އޯމަރ ބޮލަޓްއެވެ. އިކޮނޮމިކް މިނިސްޓްރީން ވަނީ ދެ ގައުމުގެ ދެމެދުގައި ސޮއިކުރި ވިޔަފާރީގެ އެއްބަސްވުމާގުޅޭ ބައެއް މައުލޫމާތު ހިއްސާކޮށްފައެވެ.
މިއެއްބަސްވުމުގެ ދަށުން ތުރުކީވިލާތަށް އެކްސްޕޯޓްކުރާ މަހުގެ ބާވަތްތަކަށް ލުއި ހޯދާދިނުމުގެ އިތުރުން ވިޔަފާރީގެ ހުރަސްތައް ކުޑަކުރެވި، ދެޤައުމުގެ ދެމެދުގައި ވިޔަފާރީގެ ގުޅުން ވަރުގަދަ ކުރުމާއި، ދިވެހިރާއްޖެއާއި ތުރުކީވިލާތާ ދެމެދު ކުރެވޭ ވިޔަފާރި އިތުރުކުރުމަށް މަގުފަހިވެގެންދާނެއެވެ. ދިވެހިރާއްޖޭން މަސް އެކްސްޕޯޓްކުރާ ފަރާތްތަކަށް ތުރުކީގެ މާކެޓްގައި ވިޔަފާރި ފުޅާކުރުމުގެ ފުރުސަތު ފަހިކުރެވި ދިވެހިރައްޔިތުންނާއި ވިޔަފާރިތަކަށް ތުރުކީގެ އުފެއްދުންތައް އަގުހެޔޮކޮށް ލިބުމުގެ ފުރުސަތު ފަހިވެގެންދާނެއެވެ.
އެއްބަސްވުމަށް އަމަލުކުރަން ފަށާނީ އަންނަ އަހަރުގެ ފުރަތަމަ ކުއާޓަރުގައި، ދެ ގައުމުގެ ސަރުކާރުން ކަނޑައަޅާ ތާރީޚެއްގައެވެ.
މިއީ މިދިޔަ އަހަރު ރައީސް ޑރ. މުހައްމަދު މުއިއްޒު ތުރުކީއަށް ކުރެއްވި ދަތުރުފުޅުގައި އެ ގައުމުގެ ރައީސް ރަޖަބް ޠައްޔިބް އުރުދުޣާނާ ބައްދަލުކުރައްވައި ނިންމެވި ކަންތައްތަކުގެ ތެރޭގައި ހިމެނޭ ކަމެކެވެ.
