މާލޭގައި ފިހާރައެއްގެ ސޭޓެއްގެ ކަރަށް ވަޅިން ހަމަލާދިން މައްސަލާގައި ހައްޔަރުކުރި އަންހެން މީހާ ތޫނު ހަތިޔާރުން އެހެން މީހަކަށް ހަމަލާދިން މައްސަލައެއްގައި ތަހުގީގު ނިމެންދެން ބަންދުކުރަން ކްރިމިނަލް ކޯޓުން އިއްޔެ އަމުރުކޮށްފި އެވެ.
މި މައްސަލައިގައި ބަންދުގައި ބަހައްޓަން އަމުރުކުރީ ތ. ތިމަރަފުށި، ސަލްވާ، ފާތިމަތު ޝަހުދާ (30އ) އެވެ.
މިދިޔަ އަހަރު މާލޭގައި ފިހާރައެއްގެ ސޭޓެއްގެ ކަރަށް ވަޅިން ހަމަލާދިން މައްސަލާގައި ހައްޔަރު ކުރުމަށްފަހު ދޫކޮށްލާފައިވާ އެ މީހާ މިދިޔަ މަހުގެ 15 ވަނަ ދުވަހު ހައްޔަރުކުރީ ތޫނު ހަތިޔާރު ބޭނުންކޮށްގެން މާރާމާރީ ހިންގުމާއި މުދަލަށް ގެއްލުން ދިނުމުގެ ތުހުމަތުގަ އެވެ.
ކްރިމިނަލް ކޯޓުގެ އަމުރުގައި ބުނެފައިވާ ގޮތުގައި އޭނާ ބަންދުގައި ބަހައްޓަން އަމުރުކުރީ ކުށުގެ ތުހުމަތުކުރެވޭ މިންވަރަށް ހެކި ހުށަހަޅާފައިވުމުންނެވެ. އެގޮތުން މައްސަލަ ހުށަހަޅާ ފަރާތުން ފާހަގަކޮށްފައިވާ ގޮތުގައި ތޫނު އެއްޗަކުން ހަމަލާދިންކަމާއި، ފުލުހުން އޭނާ ހައްޔަރުކުރަން އުޅުނު ވަގުތު އޭނާ ވަޅި ބިންމައްޗަށް އެއްލާލިކަން ފުލުހުން ފާހަގަކުރި ކަމަށް އަމުރުގައި ބުނެފައިވެއެވެ.
އޭނާ ބަންދުގައި ބަހައްޓަންޖެހޭ ހާލަތެއްގެ ގޮތުގައި އަމުރުގައި ބުނެފައި ވަނީ، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫގެ ދަށުން މުޖުތަމައުގެ ސަލާމަތާއި ރައްކާތެރިކަމަށްޓަކައެވެ.
ތިމަރަފުށީގައި ވެސް އޭނާ ތޫނު އެއްޗެހިން މީހުންނަށް ހަމަލާދީގެން ދޭތެރެ ދޭތެރެއިން ހައްޔަރުކުރެ އެވެ.
