ރާއްޖޭގެ އާބާދީ ދޮށިއުމުގެ އާބާދީއަކަށް މިސްރާބުޖަހައި، އާބާދީއަށް ބޮޑު ބަދަލުތަކެއް ބާރު ދުވެލީގައި އަންނަމުންދާ ކަމަށް އިޖުތިމާއީ އަދި އާއިލީ ތަރައްޤީއާ ބެހޭ ވަޒީރު ޑރ އައިޝަތު ޝިހާމު ވިދާޅުވެއްޖެއެވެ.
މިނިސްޓަރު އައިޝަތު ޝިހާމު ވަނީ އިންޑޮނޭޝިއާގެ ބާލީގައި ކުރިއަށްދާ “ރީޖަނަލް ކޮންފަރެންސް އޮން ޕޮޕިއުލޭޝަން އޭޖިން” ގައި ކުރިއަށް ދިޔަ “ރީ-ފްރޭމިން އޭޖިން ހައި ލެވެލް ޕެނަލް ޑިސްކަޝަން” ގައި ބައިވެރިވެ ވަޑައިގެން ދިވެހިރާއްޖޭގެ އާބާދީއަށް އަންނަމުންދާ ބަދަލުތަކާއި، އެއާއި ގުޅިގެން ދެމެހެއްޓެނިވި ތަރައްގީއަށް ކުރާނެ އަސަރުތަކުގެ މައްޗަށް އަލިއަޅުވާލާފައެވެ.
މިގޮތުން އައިޝަތު ޝިހާމު ވިދާޅުވީ އާބާދީއަށް ބޮޑު ބަދަލުތަކެއް ބާރު ދުވެލީގައި އަންނަމުންދާއިރު، ދެމެހެއްޓެވިނި ތަރައްގީގެ ސިޔާސަތުތައް ތަންފީޒުކުރުމުގައި އާބާދީއަށް އަންނަ ބަދަލުތަކަށް ރިއާޔަތް ނުކުރެވިއްޖެނަމަ އެއީ އިޤްތިސާދީ ގޮތުންނާ އިޖްތިމާއީ ގޮތުން އެކިވަރުގެ ގޮންޖެހުމަކާއި ކުރިމަތިލާން ޖެހިދާނެ ކަމެއްކަމަށެވެ. އަދި އެއީ ރާއްޖޭގެ އާބާދީއަށް މި ބަދަލުތައް އަންނަމުންދާކަން ދެނެގަނެ، ދުރު ރާސްތާއަށް ވިސްނައި، އާބާދީގެ ސިއްހީ އަދި އިޖުތިމާއީ ދުޅަހެޔޮކަން ކަށަވަރުކުރުމަށާއި، ދޮށީ އުމުރުގެ އާބާދީއާއި ރައްޓެހި އުމްރާނީ ތަރައްގީގެ ސިޔާސަތު އެކަށައެޅުމާއި، ޖީލުގެ ތަފާތުތަކާއި ފަރަގު ކުޑަކުރުމާއެކު އެންމެން ޝާމިލުވާ ދުޅަހެޔޮ މުޖުތަމައަކަށް ދިވެހިރާއްޖޭގެ އާބާދީ ބައްޓަންކުރުމުގެ މަގްސަދުގައި ގައުމީ “އޭޖިންގް ޕޮލިސީ” އެއް އެކަށައެޅުމުގެ މަސައްކަތް ކުރެވެމުންދާކަމަށް އައިޝަތު ޝިހާމް ވިދާޅުވިއެވެ.
އިތުރަށް މިނިސްޓަރު ވަނީ އާބާދީއަށް އަންނަ ބަދަލުތަކާއިއެކު ދެމެހެއްޓެނިވި ތަރައްގީގެ ސިޔާސަތުތައް ބިނާކުރުމުގައި މޫސުމަށް އަންނަ ބަދަލުތަކާއި، ސިއްހީ ދާއިރާ އަދި އިޤްތިޞާދަށް ދިމާވާނެ ގޮންޖެހުންތައް ފަދަ ތަފާތު އިޖުތިމާއީ މައްސަލަތަކަށް އިއާޔަތްކުރުމުގެ މުހިންމުކަމުގެ މައްޗަށް ވެސް އަލިއަޅުވާލައްވާފައެވެ.
މީގެ އިތުރުން މިނިސްޓަރު ވަނީ “އޯގާތެރި މުޖުތަމައެއް ބިނާކުރުމަށް” ރައީސުލްޖުމްހޫރިއްޔާ ޑރ މުހައްމަދު މުއިއްޒު ގެންގުޅުއްވާ ސިޔާސަތަކީ ދުޅަހެޔޮ ދޮށީއުމުގެ އާބާދީއަކަށް މަގުކޮށައިދޭނެ، ފުދުންތެރި އާބާދީއެއް ބިނާކޮށް، އޭގެ ސަބަބުން ދެމެހެއްޓެނިވި ގޮތެއްގައި މަންފާތައް ލިބިގެންދާނެ ސިޔާސަތެއްކަމަށް ވިދާޅުވެފައެވެ.
އިތުރަށް މިނިސްޓަރު ވަނީ އެ ލަނޑުދަނޑި ހާސިލްކުރުމަށްޓަކައި އުމްރާނީ ގޮތުންނާއި، އިޤްތިޞާދީ ގޮތުންނާއި، ޑިޖިޓަލައިޒޭޝަންގެ ދާއިރާއިން ކުރެވޭ ތަފާތު މަސައްކަތްތަކާއި ހިންގާ ތަފާތު ޕްރޮޖެކްޓުތައް އެއްކީލަވާނެހެން ކުރިއަށް ގެންދިއުމުގެ މަސައްކަތް ސަރުކާރުން ކުރަމުން މިހާރު ވެސް ކުރަމުން ގެންދާއިރު، އޭގެ ރަނގަޅު ނަތީޖާ ދުރު ރާސްތާއަށް ބަލައި ފެނިގެންދާނެކަމުގެ ޔަގީންކަން އޮތްކަން ފާހަގަކުރައްވާފައެވެ.
