ތިނަދޫ ސިޓީގައި ސަރުކާރުން ޢިމާރާތް ކުރަމުންދާ 200 ހައުސިންގ ޔުނިޓަށް ކުރިމަތި ލުމަށް ފުރުސަތު ހުޅުވާލައިފިއެވެ.
ތިނަދޫ ސިޓީ ކައުންސިލުން މިމަހުގެ 22 ވަނަދުވަހު އާންމުކޮށްފައިވާ އިއުލާނުގައި ބުނެފައިވަނީ ތިނަދޫ ސިޓީއަށް ދިމާވެފައިވާ ބޯހިޔާވަހިކަމުގެ މައްސަލައަށް ޙައްލު ހޯދައިދިނުމަށް ތިނަދޫ ސިޓީ ކައުންސިލާއި، ސަރުކާރުން އެކަށައަޅާފައިވާ ސިޔާސަތުގެ ދަށުން، ތިނަދޫ ސިޓީގެ ރައްޔިތުންނަށާއި، ތިނަދޫ ސިޓީއަށް ޙިޖުރަކުރަން ބޭނުންވާ އެހެނިހެން ދިވެހި ރައްޔިތުންނަށް ޚާއްޞަކޮށްގެން ތިނަދޫ ސިޓީގައި ސަރުކާރުން ޢިމާރާތް ކުރަމުންދާ 200 ހައުސިންގ ޔުނިޓް ދޫކުރުމަށް އިޢުލާން ކުރާކަމަށެވެ.
އަދި 200 ހައުސިންގ ޔުނިޓް ދޫކުރުމުގެ އުޞޫލާއި، ފޯމް ޕޯޓަލް މެދުވެރިކޮށް ހުށަހެޅުމުގެ ފުރުޞަތު 01 ސެޕްޓެމްބަރ 2024 އިން ފެށިގެން ހުޅުވާލެވޭނޭ ކަމަށް އިއުލާނުގައި ބުނެފައިވެއެވެ.
ރައީސް ޔާމީން އަބްދުލް ގައްޔޫމްގެ ސަރުކާރުގައި ތިނަދޫގައި ވަނީ ތިން ކޮޓަރީގެ އެޕާޓްމަންޓްތަކެއް ހިމެނޭ ގޮތަށް 120 ހައުސިން ޔުނިޓް އަޅާފައެވެ.
