“ގުޅިގެން މީރާ” ގެ ނަމުގައި އިނިޝިއޭޓިވްއެއް އިފްތިތާހުކޮށްފިއެވެ.
މި އިނީޝިއޭޓިވް އިފްތުތާހުކޮށްދެއްވީ 3 އޮގަސްޓު ވީ ހޮނިހިރު ދުވަހުގެ ރޭ މީރާގެ 14 ވަނަ އަހަރީދުވަހުގެ މުނާސަބަތުގައި މި އިނިޝިއޭޓިވް އިފްތިތާހުކުރުމަށް ބޭއްވި ހަފްލާގައި ޝަރަފުވެރި މެހެމާނުގެ ގޮތުގައި މާލީ ވުޒާރާގެ މިނިސްޓަރ، ޑރ. މުހައްމަދު ޝަފީޤްއެވެ.
މި އިވެންޓްގައި މިނިސްޓަރގެ އިތުރުން، މީރާގެ ކޮމިޝަނަރ ޖެނެރަލް ހަސަން ޒަރީރާއި، ޑެޕިއުޓީ ކޮމިޝަނަރ އަސްމާ ޝަފީއު، މީރާގެ ކުރީގެ ކޮމިޝަނަރ ޖެނެރަލް ފަތުހުﷲ ޖަމީލާއި މީރާގެ ކުރީގެ އަދި މިހާރުގެ އިސްބޭފުޅުންނާއި، ބޯޑު މެންބަރުންނާއި އަދި މީރާގެ މުވައްޒަފުން ބައިވެރިވެފައިވާ ކަމަށް މީރާއިން މައުލޫމާތުދެއެވެ.
‘ގުޅިގެން މީރާ’ ގެ މަޤްސަދަކީ މީރާ އާއި ޓެކްސްދައްކާ ފަރާތްތަކާއި ދެމެދު އޮންނަ ގުޅުން އިތުރަށް ވަރުގަދަކުރުމާއި، ޓެކްސްދައްކާ ފަރާތްތަކުން މީރާއަށް ކުރާ އިތުބާރު އިތުރުކުރުމާށާއި، މީރާގެ ސްޓޭކްހޯލްޑަރުންނާ (ޓެކްސްދައްކާ ފަރާތްތައް، ޓެކްސް އެޖެންޓުން، ޓެކްސް ކޮންސަލްޓަންޓްސް، ދައުލަތުގެ އެހެނިހެން އިދާރާތައް، އާންމު ރައްޔިތުން) އޮންނަ ގުޅުން ވަރުގަދަކޮށް، ވޮލަންޓަރީ ކޮމްޕްލަޔަންސް އިތުރުކުރުމަށްޓަކައި މީރާއިން ކުރިއަށްގެންދާ އިނިޝިއޭޓިވްއެއްކަމަށް މީރާއިން މައުލޫމާތުދިނެވެ.
މީގެ އިތުރުން މި އިނީޝިއޭޓިވްގެ ދަށުން މީރާއިން ދެމުންއަންނަ ޚިދުމަތްތައް އިތުރަށް ފަހިކޮށްދީ، ޓެކްސްދައްކާ ފަރާތްތަކަށް ޓެކުހުގެ ޒިންމާ އެފަރޓްލަސްކޮށްދިނުމަކީ މީރާގެ އަމާޒެއްކަމަށް މީރާއިން ފާހަގަކުރިއެވެ.
މި އިނީޝިއޭޓިވްގެ ދަށުން މީރާގެ މުވައްޒަފުންގެ މެދުގައިވެސް ހަރަކާތްތަކެއް ރާވައިފައިވާކަން އެ އިދާރާއިން ފާހަގަކުރެއެވެ.
