މިއަހަރު ހައްޖުގެ އަޅުމަކަށް ދިޔަ މީހުންގެ ތެރެއިން ގާތްގަނޑަކަށް 1000 އަށްވުރެ ގިނަ ހައްޖުވެރިން ނިޔާވެފައިވާ ކަމަށް ސައުދި އަރަބިއްޔާގެ މީޑިއާތަކުން ބުނެފިއެވެ.
ރިޕޯޓްތައް ބުނާގޮތުން ހައްޖުވެރިންގެ ގިނަބަޔަކު ނިޔާވި މައިގަނޑު ސަބަބަކީ ހޫނުގަދަވުމުގެ ސަބަބުން ލޭމައްޗަށް ދިއުމާއި އެހެނިހެން މައްސަލަތައް ދިމާވެގެންނެވެ.
ސައުދި އަރަބިއްޔާގެ މައްކާއަށް ހޫނުގަދަވެފައިވާއިރު، އޭއެފްޕީގެ ތަފާސް ހިސާބުތައް ދައްކާގޮތުން އިއްޔެއާއި ހަމައަށް 1،000 އަށްވުރެ ގިނަ ހައްޖުވެރިން ވަނީ ނިޔާވެފައެވެ. މިހާތަނަށް 10 ގައުމަކުން 1،081 މީހަކު ނިޔާވެފައިވާ ކަމަށް ރިޕޯޓްތައް ބުނާއިރު، މި އަދަދުތައް އައިސްފައި ވަނީ ރަސްމީ ބަޔާނުން ނުވަތަ އެ ގައުމުތަކުގެ ޖަވާބަށް މަސައްކަތް ކުރާ ޑިޕްލޮމެޓުންގެ ފަރާތުން ކަަމަށްވެސް ރިޕޯޓްތައް ބުނެއެވެ.
ނިޔާވި މީހުންގެ ތެރޭގައި މިސްރުން މަރުވި 58 މީހުން ހިމެނެއެވެ. އެ ގައުމުން އެކަނި 658 މީހަކު ނިޔާވިއިރު، އޭގެ ތެރެއިން 630 މީހުންނަކީ ހުއްދަ ނެތި ދިޔަ މީހުންނެވެ.
މިފަހަރު ހައްޖު މޫސުން ވެގެން ގޮސްފައި ވަނީ ސައުދީއަށް ވަރަށް ހޫނު ގަދަ ދުވަސްވަރަކަށެވެ. މީގެ ސަބަބުން ހީޓްސްޓްރޯކް ޖެހިގެން ގިނަބަަޔަކަށް ފަރުވާދޭން ޖެހުނުއިރު، ބައެއް މީހުން ނިޔާވީވެސް ހޫނުގެ ސަބަބުން ކަމަށް ރިޕޯޓްތައް ބުނެއެވެ.
ސައުދީން މިދިޔަ މަހު އާއްމު ކުރި ތަފާސްހިސާބުތައް ދައްކާގޮތުން އެ ސަރަހައްދުގެ ފިނިހޫނުމިން ކޮންމެ ދިހައަހަރަކުން 0.4 ޑިގްރީ ސެލްސިއަސް (0.72 ޑިގްރީ ފެރެންހައިޓް) މައްޗަށް އަރައެވެ.
މިފަހަރު މަރުވި މީހުންގެ އަދަދު މިހާ ގިނަވެފައި މި ވަނީ މިއީ މައްކާއަށް އާންމުކޮށް އެންމެ ހޫނު ގަދަވާ ވަރަށް ވުރެ ވެސް ހޫނު ގަދަ ދުވަސްވަރަކަށް ވުމުންނެވެ. ހައްޖުގެ އަޅުކަމުގެ ތެރޭގައި 51.8 ޑިގްރީ ސެލްސިއެސް އަށް ހޫނުމިން އެރި އެވެ.
