މިއަހަރުގެ ޙައްޖުގެ އަޅުކަމުގެތެރޭގައި ޙައްޖުވެރިންގެ އެންމެ ބޮޑު ޝަކުވާއަކަށްވީ މިނާގެ ފޭލިގެތަކުގެ ޖާގަ ކުޑަވެ ތޮއްޖެހިގެން ތިބެން ޖެހުމުގެ ޝަކުވާކަމަށް ޙައްޖު ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް ވިދާޅުވެއްޖެއެވެ.
މިއަހަރުގެ ޙައްޖުގެ އަޅުކަން ކުރިއަށްދިޔަ ގޮތާ ގުޅޭގޮތުން މައުލޫމާތު ދެއްވަވަމުން ޝަކީލް ވިދާޅުވީ ޙައްޖުގެ އަޅުކަން މިހާރަށްވުރެ ފަސޭހައިން ކުރެވޭނެ އިންތިޒާމްތައް ހަމަޖެއްސުމަށްޓަކައި ފިޔަވަޅުތަކެއް އަޅަންޖެހޭކަމަށާއި މިނާގެ ފޭލިގެތަކުގެ ޖާގަ ތަނަވަސްކުރުމަށްޓަކައި އިތުރު ޚަރަދުތަކެއް ކުރަންޖެހޭކަމަށެވެ. އަދި މިކަމަށްޓަކައި ޙައްޖުވެރިންގެ ޚިޔާލާއި މަޝްވަރާ ހޯދައި ކަންބޮޑުވުންތައް ދެނެގަނެ އެކަންކަން ރަނގަޅުކުރުމަށް މަސައްކަތް ކުރައްވާނެކަމަށް ޝަކީލް ވިދާޅުވިއެވެ.
” ޙައްޖުގެ އޮޕަރޭޝަނަކީ ބޮޑު އޮޕަރޭޝަނެއް. 1149 ޙައްޖުވެރިން އެއްތަނުން އަނެއްތަނަށް އުފުލުމަކީ ބޮޑު މަސައްކަތެއް. މީހުން އުފުލުމުގައި 25 ބަސް ބޭނުން ކުރަންޖެހުނު. މިކަމުގައި ކޯޕަރޭޝަންގެ މުވައްޒަފުންނާއި ޙައްޖުވެރިންގެ އެހީތެރިން ކުރި ބުރަ މަސައްކަތްތައް ފާހަގަކުރަން” ޝަކީލް ވިދާޅުވިއެވެ.
މީގެ އިތުރުން މިއަހަރުގެ ޙައްޖުގައި ގެއްލިގެން މަގު އޮޅުނު 100 އެއްހާ ހާޖީން ސްމާޓް ޓެގް ޑިވައިސްގެ އެހީގައި ހުރި ތަނެއް ބަލައިގެން ހޯދި ކަމަށާއި ޢަރަފާތަށް ނުވަދެވޭ އެކަކު ވެސް ނެތް ކަމަށް ޙައްޖުކޯޕަރޭޝަނުން ވަނީ ވިދާޅުވެފައެވެ.
މިއީ ހައްޖު ކޯޕަރޭޝަންގެ ތާރީޚުގައި އެންމެ ގިނަ އަދަދަކަށް ހާޖީން ގެނައި ދެވަނަ ފަހަރު ކަމަށްވާއިރު އެކޯޕަރޭޝަނުން ކުރިއަށް ގެންދިޔަ ހައްޖު އޮޕްރޭޝަން ކާމިޔާބުކަމަށް އިސްލާމީ ކަންތައްތަކާއި ބެހޭ ވަޒީރު މުހައްމަދު ޝަހީމް އަލީ ސައީދު ވެސް ވަނީ ވިދާޅުވެފައެވެ.
