ރޫމޭނިއާގެ އެންމެ ފުރަތަމަ ޔޫރޯ ފުޓްބޯޅަ މުބާރާތަކީ 1984 ގައި ފުރާންސްގައި ބޭއްވުނު މުބާރާތެވެ. އޭގެ ފަހުން ދެން އެޓީމުން ވާދަކޮށްފައިވަނީ 1996 ވަނަ އަހަރު އިންގްލެންޑް ގައި ބޭއްވި ޔޫރޯ ފުޓްބޯޅަ މުބާރާތުގައިއެވެ. މި ދެ މުބާރާތުގައިވެސް ރޫމޭނިއާއަށް ގުރޫޕް ސްޓޭޖަށްވުރެ ދުރަށް ދެވިފައެއް ނުވެއެވެ.
ރޫމޭނިއާ ޓީމުން ދެން ވާދަކުރީ 2000 ވަނަ އަހަރުގެ ޔޫރޯ ފުޓްބޯޅަ މުބާރާތުގައެވެ. މި މުބާރާތުގެ ކުއާޓަރ ފައިނަލްގައި އެޓީމުން ކުޅުނެވެ. ކުއާޓަރ ފައިނަލް އިން ރޮމޭނިއާ ބަލިވެގެން ދިޔައީ އެފަހަރުގެ މުބާރާތުގެ ދެވަނަ ހޯދި އިޓަލީ އަތުންނެވެ. މިއީ ޔޫރޯގައި ރޫމޭނިއާއަށް ލިބުނު އެންމެ ބޮޑު ކާމިޔާބެވެ.
2000 ވަނަ އަހަރުގެ މުބާރާތައް ފަހު، 2008 ވަނަ އަހަރާއި 2016 ވަނަ އަހަރުގެ ޔޫރޯގައިވެސް ރޫމޭނިއާއިން ވާދަކުރިއެވެ. މި ދެ މުބާރާތްވެސް އެޓީމުން ނިންމާލީ ގުރޫޕް ސްޓޭޖާހަމައިންނެވެ. އެންމެ ފަހުން 2020 ވަނަ އަހަރު ކުޅުން ޔޫރޯ ފުޓްބޯޅަ މުބާރާތަށް ރޫމޭނިއާ ކޮލިފައި އެއް ނުވެއެވެ.
ކޮލިފައިވީ ގޮތް
ޔޫރަޕިއަން ކޮލިފައިންގައި ރޫމޭނިޔާ ހިމެނުނީ ގުރޫޕް އައިގައެވެ. ކޮލިފައިންގައި އެޓީމުން ކުޅުނު 10 މެޗުގެ ތެރެއިން ހަ މެޗުން މޮޅުވެ، ހަތަރު މެޗު އެއްވަރުވިއެވެ. މެޗަކުން ބަލިނުވެ ރޫމޭނިއާއިން ކޮލިފައިން ނިންމާލީ 22 ޕޮއިންޓާއި އެކު ގުރޫޕުގެ އެއްވަނަ ޓީމުގެ ގޮތުގައެވެ.
މުހިންމު ކުޅުންތެރިން
ރޫމޭނިއާގައި މާ މަޝްހޫރު ގިނަ ކުޅުންތެރިންތަކެއް ނެތްނަމަވެސް، ފާހަގަކޮށްލެވޭ ހުނަރުވެރި ކުޅުންތެރިން ކޮންމެވެސް ވަރަކަށް އެބަތިއްބެވެ. އޭގެތޭގައި ކުރިން އިޓަލީގެ އިންޓަ މިލާނާއި ޖެނޯއާ އަދި ޕާމާ ފަދަ ކުލަބުތަކަށް ކުޅެފައިވާ އަދި މިހާރު އެސްއެސްސީ ބަރީއަށް ކުޅެމުން އަންނަ ފޯވަޑް ޖޯޖް ޕުސްކަސް ފާހަގަކޮށްލެވެއެވެ. ޕުސްކަސް އަކީ ރޫމޭނިއާ ޓީމުގެ އެޓޭކްގައި އެންމެ މުހިންމު ދައުރެއް އަދާކުރާނެ ކުޅުންތެރިޔާއެވެ. މީގެއިތުރުން ޓޮޓެންހަމް ޑިފެންޑަރ ރާޑޫ ޑްރަގޫސިން އަކީވެސް ރޫމޭނިއާ ޓީމުން ފާހަގަކޮށްލެވޭ ކުޅުންތެރިއެކެވެ.
ކޯޗު
އެޑްވަޑް އިއޯޑަނަސްކޫ އަކީ ރޫމޭނިޔާގެ ކުލަބުތަކުގައި މަސައްކަތް ކޮށް ކާމިޔާބީތަކެއް ވެސް ހޯދާފައިވާ ކޯޗެކެވެ. 2010 ވަނަ އަހަރު ކޯޗިން ކެރިއަރު ފެށި އިއޯޑަނަސްކޫ ރޫމޭނިއާގެ ގައުމީ ޓީމު ކޯޗުކަމާއި ހަވާލުވީ 2022 ވަނަ އަހަރުގައެވެ. އޭނާ ވަނީ ގައުމީ ޓީމާ ހަވާލުވުމަށްފަހު ބޮޑެތި ކުރިއެރުންތަކެއް ހޯދައިދީފައެވެ. އިއޯޑަނަސްކޫގެ އިރުޝާދުގެ ދަށުން ރޫމޭނިއާއިން ރަނގަޅު ކޮލިފައިން ކެމްޕޭނެއް ވަނީ ނިންމާލާފައެވެ. ނަތީޖާއެއްގެ ގޮތުން މި އަހަރުގެ ޔޫރޯ މުބާރާތުން ރޫމޭނިޔާ ފުރުސަތު ލިބިގެންދިޔައެވެ.
ގުރޫޕްގައި އޮތް ފުރުސަތު
ރޫމޭނިއާ ހިމެނުނީ، ބެލްޖިއަމް، ސްލޮވޭކިއާ އަދި ޔޫކްރޭނާއި އެކު ގުރޫޕް އީގައެވެ. މި ގުރޫޕަކީ ރޫމޭނިއާއަށް ފަސޭހަ ގުރޫޕަކަށް ނުވާނެއެވެ.
