ރޯދަ މަސް ފެށުމުގެ ކުރިން ކުންފުނިތަކުގައި މަސައްކަތް ކުރާ ދިވެހި ރައްޔިތުންނަށް ރޯދަ އެލަވަންސް ދިނުމަށް ލޭބާ ރިލޭޝަން އޮތޯރިޓީ (އެލްއާރްއޭ)އިން އަންގައިފިއެވެ.
އެލްއާރްއޭއިން ބުދަ ދުވަހު ކުރި އިއުލާނެއްގައި ބުނީ ވަޒީފާއާ ބެހޭ ގާނޫނުގައި ބަޔާންކޮށްފައި ވާގޮތުގެ މަތިން، ރޯދަ މަސް ފެށުމުގެ ކުރިން ދިވެހި ކޮންމެ މުވައްޒަފަކަށް 3000 ރުފިޔާ ދޭންޖެހޭނެކަމަށެވެ.
“ވަޒީފާ ދޭ ބައެއް ފަރާތްތަކުން މުވައްޒަފުންނަށް ރޯދަ މަހުގެ އިނާޔަތް ނުދޭކަމާއި، އިނާޔަތް ދިންކަމުގައި ވިޔަސް ގާނޫނުގައި ބަޔާންކޮށްފައިވާ ވަރަށް ދީފައި ނުވާކަން މީގެ ކުރިންވެސް ފާހަގަކުރެވިފައިވޭ,” -އެލްއާރްއޭ-
މުވައްޒަފުން ގެންގުޅޭ ފަރާތްތަކުން 1445 ވަނަ އަހަރުގެ ރޯދަ މަސް ފެށުމުގެ ކުރިން ރޯދަ މަހުގެ އިނާޔަތް ދިނުމަށް އެ އިދާރާއިން “ހަނދާންކޮށްދޭކަމަށް” އިއުލާނުގައި ބުނެފައިވެއެވެ.
ވަޒީފާއާއި ބެހޭ ގާނޫނުގައި ބުނެފައިވަނީ ވަޒީފާ އަދާކުރާ ކޮންމެ ދިވެހި މުވައްޒަފަކަށް ރޯދަމަހުގެ އިނާޔަތުގެ ގޮތުގައި ކޮންމެ އަހަރެއްގެ ރޯދަ މަސް ފެށުމުގެ ކުރިން 3000 ރުފިޔާ ދޭންޖެހެއެވެ. ވަޒީފާ އަދާކުރާ ބިދޭސީ މުސްލިމް މުވައްޒަފުންނަށް ރޯދަ މަހުގެ އިނާޔަތް ދިނުމަކީ ވަޒީފާ ދޭ ފަރާތުގެ އިހުތިޔާރުގައި އޮންނަކަމެކެވެ.
ރޯދަ އެލަވަންސް ނުދީފިނަމަ އެ ކަމަށް ނަސޭހަތްތެރިވެ، އެ ކަން ތަކުރާރުވެެއްޖެ ނަމަ 5000އާ 50،000އާ ދެމެދުގެ އަދަދަކުން ޖޫރިމަނާ ކުރެވިދާނެއެވެ. އަދި ވަޒީފާ ދޭ ފަރާތްތަކަށް ސަރުކާރުންދޭ ހުއްދަ ބާތިލުކުރުން ފަދަ ފިޔަވަޅުތައް ވެސް އެޅިދާނެކަމަށް ގާނޫނުގައި ބުނެފައިވެއެވެ.
