ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަން އެޕްރީލް މަހު ބޭއްވުމަށް ނިންމައިފިއެވެ.
ގުރައިދޫ ދާއިރާގެ މެމްބަރު ރިޒާ އަވަހާރަވުމާއި ގުޅިގެން އެ ދާއިރާގެ ބައި އިލެކްޝަން ބޭއްވުމާއި ގުޅޭ ގޮތުން އިލެކްޝަން ކޮމިޝަނުން މިއަދު ވަނީ މަޝްވަރާކޮށްފައެވެ. އިލެކްޝަން ކޮމިޝަނުން ބޭއްވި ބައްދަލުވުމުގައި އިންތިހާބު ބާއްވާނެ ތާރީހެއް ނިންމާފައިވާއިރު މިކަމާއި ގުޅޭ އިތުރު ތަފްސީލެއް އަދި ހާމަކޮށްފައެއް ނުވެއެވެ. ރިޒާ އަވަހާރަވުމާއި ގުޅިގެން ހުސްވެފައިވާ ގުރައިދޫ ދާއިރާގެ މަޖިލީސް ގޮނޑިއަށް މެމްބަރަކު ހޮވުމަށް ބާއްވާ އިންތިހާބު އޮންނަނީ އަންނަ އެޕްރީލް މަހުގެ 15 ވަނަ ދުވަހުއެވެ.
ރިޒާ އަވަހާރަވީ ކެންސަރުގެ އާލާސްކަންފުޅަށް މެލޭޝިއާގައި ފަރުވާ ހޯއްދަވަމުން ދަނިކޮށް މި މަހުގެ 23 ވަނަ ދުވަހުއެވެ.
މެމްބަރަކު އަވަހާރަވެއްޖެނަމަ ހަ ދުވަހުގެ ތެރޭގައި ބައި-އިލެކްޝަން އިއުލާން ކުރުމަށް އީސީގެ މައްޗަށް ގާނޫނު ލާޒިމުކުރެއެވެ. އެހެންކަމުން ގުރައިދޫ ދާއިރާގެ ބައި-އިލެކްޝަން އަންނަ އަންގާރަދުވަހުގެ ކުރިން އިއުލާންކުރަންޖެހެއެވެ.
