ސިހުރުވެރިންނަކީ އިންސާނުން ދެކެ ލޯބި ނުވާ، ހިތުގައި އިންސާނުންނަށް އެއްވެސް އޯގާތެރިކަމެއް އަދި ކުލުނުވެރިކަމެއް ނެތް ޝައިތާނުން ތަކެކެވެ. ސިހުރުވެރިންގެ މަގުސަދަކީ މީހުން ގިލަންވެރި ކުރުވުމާއި، މީސްތަކުންނަށް ގޯނާ ކުރުމާއި އޮޅުވާލައިގެން އަގީދާ ބަލިކަށީ މީހުންގެ ސިކުނޑިތަކާއި ކުޅެގެން އެމީހުންގެ ޖީބު ތަނަވަސް ކުރުމެވެ.

މި ޒަމާނުގައި މީސް މީޑިއާ އިން ސިހުރު ހާހުރާ އާއި ދީނުގައި ހުއްދަ ނޫން އެތައް ކަމެއް ދަސްކޮށްދެމުން ދެއެވެ. ސިހުރުވެރިންނާއި ސިހުރުވެރިންގެ ގާތަށް ގޮސް އެމީހުންގެ ބަސް ގަބޫލުކުރާ މީހުންނަކީ އީމާންކަމުގެ ދާއިރާއިން ބޭރުވެފައިވާ މީހުންނެވެ.

ރަސޫލާގެ ހަދީޘެއްގައި އިންސާނުން ހަލާކު ކުރަނިވި ހަތް ކަމެއްގެ ތެރޭގައި އެންމެ ފުރަތަމަ ބަޔާންކުރައްވާފައި ވަނީ ޝިރުކު ކުރުމާއި ސިހުރު ހެދުމެވެ. އެއަށްފަހު މާތް ﷲ ހުރުމަތްތެރި ކުރައްވާފައިވާ ނަފްސެއް ހައްގަކާއި ނުލާ މެރުމާއި، ރިބާ ކެއުމާއި، ޔަތީމުންގެ މުދާ ކެއުމާއި، ޖިހާދުގެ މައިދާނުގައި ހަނގުރާމައިގެ ވަގުތުގައި ފުރަގަސްދީ ފިލުމާއި، އިއްފަތްތެރި ސޯލިހު މުއުމިނު އަންހެނުންނަށް ޤަޛްފު ކުރުމެވެ. މި ބަސްފުޅަށް ވިސްނާލާއިރު، ސިހުރުގެ ނުބައިކަން މީހުން މެރުމަށް ވުރެ ބޮޑުކަން އެނގެއެވެ،

އެއީ ސިހުރުގެ ސަބަބުން މުޖުތަމައު ރޫޅި، އެކުވެރިން ހަތުރުވެރިވެ، ނާމަންކަން ފެތުރި، ސިހުރުވެރިންގެ ސަބަބުން މީސްތަކުންގެ ހިތްތަކަށް ބިރުވެރިކަން ވަދެ، އާއިލާތައް ރޫޅުމަށް މެދުވެރިވާތީއެވެ. އަދި ސިހުރުވެރިންގެ ސަބަބުން ދުޅަހެޔޮ އެތައް ބަޔަކު ބަލި މީހުންނަށްވެ، އެތައް ބާއްޖަވެރިންނެއް އަބާއްޖަވެރިވެގެން ދެއެވެ.

އިސްލާމީ މުޖަތަމުތަކުގައި ސިހުރު ހާހޫރައިގެ ވަބާ ފުޅާ މިންވަރަކަށް ފެތުރިގެން ދިޔައީ މީސްތަކުންގެ ނަފްސުތަކުގެ މައްޗަށް މާއްދިއްޔަތު ވެރިވެ، ހިތްތައް ހަރުވެ، ހަސަދަވެރިކަމާއި ރުޅިވެރިކަން އިތުރުވެ އަގީދާ ބަލިކަށިވުމުގެ ސަބަބުންނެވެ.

މިކަމުގެ ސަބަބުން މީސްތަކުން ވަހްމާއި، ޝައްކުގެ ތެރެއަށް ގެނބި ނަފްސާނީ ބަލިތަކުގެ ޝިކާރައަކަށް ވުމުންނެވެ. ގޭގައި ޤުރްއާން ކިޔެވުމާއި ޒިކުރު ކުރުން މަދުވެ، ޝައިތާނާގެ ކުޅިސަމާ ކުޅޭ ވެށްޓަކަށް ގެދޮރު ބަދަލުވުމުގެ ސަބަބުންނެވެ. ސިހުރު ހާހުރައިން ސަލާމަތް ވެވޭނީ ﷲގެ ހަޟްރަތަށް ރުޖޫއަވެ، ދުއާކޮށް ޒިކުރު ކުރުން ގިނަކޮށްގެންނެވެ.