ނަފްސާނީ ބަލިތަކަށް ފަރުވާ ދެއްވާ، ކްލިނިކަލް ސައިކޮލޮޖިސްޓް ޑރ. އައިޝަތު އަލީ ނާޒް ފަރުވާ ދިނުމުގައި އިހުމާލުވާ ކަމަށް ކުރެވުނު ތުހުމަތުތަކާއެކު ހެލްތް މިނިސްޓްރީން އެ މައްސަލަ ބަލަން ފަށައިފިއެވެ.
ނަފުސާނީ ފަރުވާ ދިނުމުގައި ރާއްޖޭގައި ހުރި އެންމެ ތަޖުރިބާކާރު ބޭފުޅާ ކަމަށްވާ ޑރ.އައިޝަތު އަލީ ނާޒް އާއި އޭނާ ހިންގަވާ ނަފުސާނީ ފަރުވާދޭ ކްލިނިކް، މިޕްސްޓާއަށް، މިފަހުން ގިނަ ބަޔަކު އަންނަނީ ބޮޑެތި ތުހުމަތުތަކެއްކޮށް، ސޯޝަލް މީޑިއާގައި ޝުއޫރުފާޅު ކުރަމުންނެވެ. އެގޮތުން ބޮޑު އަގު ނެގުމަށް ފަހު ޓެސްޓްތަކުގެ ނަތީޖާ ނުދޭކަމަށް ބައެއް މީހުން ބުނެފައިވެއެވެ. އަދި ރަނގަޅަށް ނުބަލައި ނަފްސާނީ ބަލިތައް ހުންނަ ކަމަށް ނާޒް ނިންމާ ކަމަށް ވެސް ބައެއް މީހުން ތުހުމަތު ކުރެއެވެ.
ނާޒް އަށް ބޮޑެތި ތުހުމަތުތަކެއްކޮށް އެކަން ފުރަތަމަ އާއްމު ކުރީ ޓީވީއެމްގެ ޕްރެޒެންޓަރ ޝަމްރާ ޝަމީމް (ކުޑޫ) އެވެ. ކުޑޫގެ ޕޯސްޓާއިއެކު އެތައް ބަޔަކު ވަނީ ފޭސްބުކް އާއި ޓްވިޓާ އަދި ޓިކްޓޮކްގައި ވެސް އެމީހުންގެ ޝަކުވާތައް ބަންޑުން ކޮށްލާފައެވެ
މި މައްސަލައާއި ގުޅިގެން ހެލްތު މިނިސްޓްރީގެ ސީނިއާ އެގްޒެކެޓިވް ޑިރެކްޓަރު އައިމިނަތު ޝަތުފާ ވިދާޅުވީ ޑރ. ނާޒްގެ މައްސަލަ އެއްވެސް ފަރާތަކުން އެ މިނިސްޓްރީއަށް ހުށަހަޅާފައި ނުވާ ކަމަށާއި ނަމަވެސް އެކަން ސޯޝަލް މީޑިއާ މެދުވެރިކޮށް އެ މިނިސްޓްރީގެ ސަމާލު ކަމަށް އައުމުން އިސްވެ ބަލާ މައްސަލައެއްގެ ގޮތަށް ބަލަން ފަށާފައިވާ ކަމަށެވެ.
ޑރ. ނާޒް ވަނީ މިކަމާއި ގުޅޭ ގޮތުން ސޯޝަލް މީޑިއާގައި އޭނާގެ މައްޗަށް ކޮށްފައިވާ ތުހުމަތުތައް ދޮގު ކުރާ ކަމަށް ވިދާޅުވެފައެވެ. އަދި މި މައްސަލާގައި އިތުރަށް ވާހަކަ ދައްކާނީ ގާނޫނީ ވަކީލުން ކަމަށް ވެސް ނާޒް ވަނީ ވިދާޅުވެފައެވެ.
